CEBU, Philippines — Nagplano ang Kapitolyo mopahigayon og “rapid massive targeted testing for COVID-19” sa Probinsya sa Sugbo aron pagsuta kun ang usa ka indibidwal adunay igong antibodies sa lawas nga makasugakod sa virus.
"Mao kini ang mo testing sa kada-isa kung naa bay adequate number of antibodies nga aduna tay measure of assurance nga kung ikaw mobalik og trabaho, dili ka maka infect sa uban," matud ni Gobernador Gwendolyn Garcia.
Apan dili tanan ang mapaubos sa test tungod kay aduna lang pilion nga lugar kini himuon.
Anaa sa 30,000 ngadto sa 50, 000 ang paliton nga kits sa Kapitolyo ug ang mga medical experts sa UP-Cebu maoy mobasa sa resulta ug mao sab motabang sa pag-umol sa probinsya og bag-ong protocol aron hinay-hinay nga mobalik ang ekonomiya sa probinsya. Sa pagkakaron aduna nay 191 positibo sa COVID-19 tibuok rehiyon human nga sa 128 ka swabs nga gi-test kagahapong adlawa, usa ang positibo gikan sa Dakbayan sa Sugbo.
Sa mga swabs nga gi test kagahapon, 24 niini gikan sa Probinsya sa Sugbo, 36 sa Dakbayan sa Sugbo, 10 sa Mandaue ug 58 sa Lapu-Lapu City.
Sa pikas bahin, miabot na og 613 ang mga naayo sa maong sakit sa tibuok nasud human natala sa DOH ang dugang 41 nga pasyenteng naulian, samtang nisaka na sab ngadto sa 6,459 ang gidaghanon sa mga nataptan niini sa tibuok nasud human dunay 200 nga nagpositibo kagahapong adlawa.
Samtang 19 sab ang namatay kagahapon tungod gihapon sa maong sakit. Sa kinatibuk-an miabot na og 428 ang namatay tungod sa komplikasyon sa COVID-19. /IBM (BANATNEWS)