Pagsulod sa Talisay mas istrikto na

CEBU, Philippines — Gipakigkitaan ni Talisay City Mayor Gerald Anthony “Samsam” Gullas Jr. ang mga frontliners nga mobantay sa border sa Siyudad sa Sugbo.

Matud ni Gullas nga sugod ugma mas hugot pa ang ilang pagpasulod sa mga tawo nga gikan sa Siyudad sa Sugbo gawas lang sa mga tawo nga exempted sa gipagawas nga Executive Order ni Gobernador Gwendolyn Garcia.

Gipasabot ni Gullas nga adunay mga butang nga makontrolar ug kini mao ang istirkto nga pagpatuman sa pagpasulod sa mga tawo gikan sa laing lugar.

Anaa ang kapolisan, marines, force multipliers, disaster team, traffic team, kabomberohan ug mga volunteers nga maoy mohimo niini 24-oras. Mahimong entrance mao nalang ang South Road Properties (SRP) samtang ang Bulacao sa Natalio Bacalso Avenue ang sirad-an lakip na ang Manipis, Dawis, Candulawan, Salvador Tanke ug Inayawan.

Gipasalamatan sa mayor ang mga tawo nga mohimo niini samtang aduna sab butang nga dili makontrolar sa katawhan ug mao kini ang virus nga dili makita.

Siya nagtuo nga mapugngan ang pagkatap niini pinaagi sa pagpuyo sa tagsa-tagsa ka panimalay.

Gawas niini isalig nalang ang tanan ngadto sa Labaw’ng Makagagahum nga makalingkawas niining krisis nga giatubang karon.

Gibitbit ug gipakita ni Gullas ang iyang gamay nga imahe sa Balaang Bata nga si Senyor Santo Niño ngadto sa mga frontliners aron giyahan sila sa ilang mga gimbuhaton. /GMR (BANATNEWS)