CEBU, Philippines — Giangkon ni Barangay Luz Councilor Maynard Salinguhay nga dili gyud andam ang ilang barangay alang sa lockdown nunot sa kadaghan sa nagpositibo sa coronavirus (COVID-19) sa ilang barangay.
Niadtong Abril 17, gimando ni Cebu City Mayor Edgardo Labella ang pag-lockdown sa tibuok nga barangay human natala ang 82 ka positibo sa coronavirus diha sa Sitio Zapatera.
Ang Cebu City adunay kinatibuk-an nga 135 nga positibo sa COVID-19 positibo nga mga kaso sa lugar. Gipasabot ni Salinguhay nga karon nakig-coordinar na sila sa lungsod ug gipahibalo ang mga residente nga mag-andam alang sa lockdown.
“Kung ang barangay ang saligan sa lockdown dili gyud, even for Sitio Zapatera dili gyud ready, kulang atong resources. Ang provision sa pagkaon, kung mag total lockdown same sa Zapatera... unya kung ang entire barangay Luz ang buhaton ing-ana, how will the city provide sa needs sa tanan?,” matud ni Salinguhay.
Matud niya nga sa Sitio Zapatera gani problema na karon ang supply sa tubig nga mainom kay gipasirad-an ang water refilling station sa ilang dapit.
Dul-an sa 22 mil ang populasyon sa ilang barangay.
Wa pa sab silay guidelines sa lockdown maong wala pa gyud sila masayod unsay buhaton.
Samtang giklaro niya nga walay kamatuoran ang mga nikatap sa social media nga dunay taga Zapatera nga nangikyas tungod kay nalibotan sila og mga polis.
Mihangyo siya sa publiko nga hunongon kining pagpasa-pasa og mga dili beripikadong balita sa social media ug pagtamay sa mga nataptan sa COVID-19 diha sa ilang barangay.
Sa pikas bahin, ang Cebu City Market Operations Division pinaagi ni City Market Administrator Jonil Matuguina mipahibalo sa pagsanong sa mga sakop sa Cebu City Market Vendors sa panawagan sa mga taga Zapatera nga hatdan sila og mga pagkaon didto.
Nagkalain-laing produkto ang gihatag sa mga vendors sama sa bugas, itlog, buwad, isda, karne, utanon, sabon ug uban pa nga dakong tabang na alang sa mga residente sa maong sitio. Decemay P. Padilla/IBM (BANATNEWS)