CEBU, Philippines — Kaning nagpadayong sitwasyon bahin sa COVID-19 nagpabalik sa akong hunahuna sa among kaagi kaniadto. Ang uban niini, nahitabo sa dihang bata pa ko. Ang kadaghanan ani kagul-anan apan nakapadasig sa akong kasingkasing.
Dili ba makahibulong nga adunay mga sitwasyon nga magsige og bukbok kanato apan bisan giunsa wala gyud ta malup-og ug nahimo pa hinuong tinubdan sa atong kusog? Duna koy personal nga kasinatiang susama niini. Kun mahinumdoman gani nako ni, makatawa ko ug bation og kadako sa akong garbo.
Ikaduhang Kalibutanong Gubat, usa sa mga lisod nga kaagi sa among pamilya. Nakahinumdom pa ko kun unsa kadto ka lisud para sa akong Papa Inting. Busy siya sa gamay nga eskuylahan nga iyang gitukod, ang kaniadto Visayan Institute nga nahimo na karong University of the Visayas. Wa siyay panahon sa politika sa gubat; nagpadistansya lang siya.
Apan ang igsuon sa akong Papa nga maoy founder sa The Freeman nga si Atty. Paulino Gullas, nasentron gyud sa mga panghitabo sa politika kaniadto. Isip bantogang abogado, nabantayan sa mga Hapon si Tiyo Paulino ug gitudlo siya isip representante sa mga Hapon dinhi sa Sugbo.
Ang akong Papa, bisan og walay gidapigan gidudahan sa duha ka habig. Ang mga Amerikano ug ang mga lokal nga mga gerilya nagdudang tigsuporta sa mga Hapon si Papa tungod kay ang iyang igsuon man maoy representante sa mga Hapon dinhi.
Sa samang higayon, nagduda sab ang mga Hapon kaniya tungod kay nakahibalo man sila nga wala gyud mopakita og suporta kanila ang Papa.
Kada adlaw, naa gyud ang peligrong sikuoon si Papa, bisan asa sa duha! Maong pirme lang gyud mi bakwit biasa asa, dili mi mopundo og dugay sa usa ka dapit. Makahadlok, apan swerte sab nga dunay mga tubig-tubigang higala ang among pamilya nga modawat kanamo.
Usahay magpatukar si Papa og lyre. Tingali mao ra to iyang paagi aron mahupay ang grabe kalisod namo nga sitwasyon. O basin , iyaha kadtong paagi sa pag-ampo nga unta makalahutay mi.
Kaniadto sayo sa buntag magbaktas mi sa akong igsuong si Eddie paduing sa mga simbahan, sa Cebu Cathedral ug San Agustin Church (karon Basilica Minore del Santo Nino) aron moserbisyo isip sakristan. Hunahunaa ra gud, duh aka batang lalaki manglakaw mi ngitngit pa diha sa hawan kaayong karsada tungatunga sa giyera. Maagian gyud namo ang usa ka pwesto sa mga sundalong Hapon nga gibutang duol sa among balay diha sa karaang Manalili Street (karon Vicente Gullas Street) ug diha sa mga simbahan.
Usahay dunay mga higayon nga Makita namo ng bayoneta sa mga Hapon nga mogidlak ini og maigo sa kahayag sa buwan. Magkurog ming duha sa akong igsuon inig makakita ani, apan amo gyud gipaningkamotan nga dili nalang tagdon.
Sa relihiyosong paggiya sa among inahan nga si Mama Pining nakatabang gyud namo. Kanunay mi niyang pahinumdoman nga naa kanamo kanunay ang Ginoo ug dili mi pasagdan. Ang iyang pagsige og awhag kanamo pagserbisyo gihapon sa simbahan bisan sa peligro nagtudlo kanamo nga kinahanglan ang sakripisyon sa pagtuo.
Tuod man, natapos ang giyera ug tibuok pa gihapon ang among pamilya.
Karon, maghunahuna ko sa maong mga kaagi ning panahon sa COVID-19. Ang sitwasyon walay kasigurohan. Wala pa makapiog ang modernong medisina sa pagkakaron bisan sa nakalabay’ng mga buwan. Apan sa kinailadman sa akong kasing kasing, sayod ko nga makalingkawas kita niini.
Ang pagampo mao ang labing maayong remedy karong mga panahona ug sa hangtud sa kahangturan. Ang atong pinalanggang Señor Santo Nino de Cebu, Mama Mary, ug atong igsuong, Servant of God Bishop Teofilo Camomot naa sa atong kiliran ug andam kanunay pagtabang kanato. Kinahanglan lang gyud tang mangayo.
Sa unahan, kaning coronavirus plague molurang ra gihapon. Ang hagit kanato karon kung unsaon paglahutay. Ang tanan naglibog pa gihapon. Mao nga impotante kaayo karon ang pag-ampo. God is good – all the time! IBM (BANATNEWS)