Barangay Luz gi-lockdown

CEBU, Philippines — Gipaubos sa lockdown ang tibuok Barangay Luz subay sa mando ni Cebu City Mayor Edgardo Labella atol sa press conference niini sa Cebu City Hall kagahapon tungod sa pagdaghan sa mga napositibo sa coronavirus COVID-19 sa usa sa mga sitio niini.

Kagahapong adlawa, gipahibalo ni Labella nga adunay 84 ka bag-ong kaso sa COVID-19 ang natala sa tibuok siyudad , ang 82 niini gikan sa Sitio Zapatera sa nahisgutang barangay , usa sa A. Lopez ug usa Katipunan nga pulos sakop sa Barangay Labangon.

Matud ni Labella sila si Cebu City Police Office Director Police Colonel Josefino Ligan ug si Major General Roberto Ancan sa Central Command napahibawo na sa maong desisyon.

Ang CCPO ug ang Central Command magtinabangay sa pagbantay sa palibot sa maong barangay aron masigurong walay makasulod ug mogawas sa tinguhang mapugngan ang pagdaghan sa mga nataptan.

Mass testing padayon

Sa pikas bahin, gihimakak sab sa mayor nga wala nay mass testing nga buhaton sa Barrio Luz. Sa pagkakaron dili lang ang Sitio Zapatera ang ipaubos sa mass testing tungod kay            ang tibuok barangay na.

“More precise na gyud ang atuang testing diha. So, ang atong ubang Sitio sa Barangay Luz there will be also mass testing to be undertaken both by the DOH and the City Health Office. I’m denying that nga ang mga medical personnel ug frontliners nga nag-mass testing diha sa Barangay Luz are not provided with PPE in fact they are using hand gloves makita man na nato, suit gyud nila,” matud ni Labella.

Ang mga residente sa lugar dili makagawas ug dili sab pasudlan mao nga ang siyudad mosuporta sa panginahanglanon niadtong mga walay ikasarang.

Daan ng nihatag og mga sinakong bugas ug P2 milyones ang siyudad ngadto sa Zapatera ug sa barangay. Gipahibalo sa mayor kun kuwangon andam ang siyudad nga dugangan kini.

“As I said gitagaan naman sila karon og P2 million, nagamit na nila, ang I think not all people there nga di maka-afford og palit og pagkaon, makapalit sad gyud na dili man sad tanan nag-depend nalang gyud sa Cebu City,” pasabot pa sa mayor.          

Asymptomatic

Ang mga nagpositibo sa COVID-19 bisan og wala’y sintomas ibutang sa quarantine facility samtang katong nahibilin padayon nga i-monitor sa siyudad.

Sumala pa sa mayor, bisan ang protocol sa DOH sa mga positive nga asymptomatic apan wala sip-una, wala hilanti i- home quarantine ra, gusto niya nga dad-on sila sa isolated area.

“Mga asymptomatic di sad nato sila isagol sa mga masakiton anha sa hospital kay wala man sila’y symptoms,” pasabot ni Labella.

Way agas

Apan usa sa mga molupyo sa maong sitio nga naka-chat sa Banat News nga mihangyong dili magpahingalan mipadayag nga nisamot ilang ka-stress karon nga tibuok barangay na nila ang gipaubos sa lockdown.

Matud pa niya, dako nilang problema sugod pa niadtong Disyembre sa miaging tuig ang supply sa tubig sa ilang sitio. Kaadlawon na kini moagas. Ang tubig gamit kaayo sa pagpanglimpyo , pagluto ug pagpangaligo sa mga residente.

Sumala pa niya, dugay na nila kining gireklamo bisan wala pa ang COVID-19 ug karon naabtan nalang sila og lockdown wa gyud atimana ilang hangyo.

Di mag-panic

Sa pikas bahin, gimandoan sa Police Regional Office 7 director Police Brigadier General Albert Ferro ang Cebu City Police Office (CCPO) nga istriktuhon ang pag monitor sa maong sitio.

“We would like to inform the public that they don’t need to panic walay fear. That’s why massive ang atong testing para ma test nato sila, kay more than 300 families na ang naa diha ug estimated mga nine thousand individuals,” matud pa ni Ferro.

Si CCPO Director Police Colonel Josefino Ligan nangunay sa pagsiguro sa kaluwasan ug sitwasyon sa mga polis nga nagbantay sa maong barangay lakip na ang ilang katulgan.  Sheriza Mae Uy/IBM (BANATNEWS)