Sweldo ni Samsam ipabahin sa barangay
CEBU, Philippines — Andam si Talisay City Mayor Gerald Anthony “Samsam” Gullas Jr. sa paghatag sa iyang sweldo aron bahinon sa mga empleyado sa barangay nga angay sab nga tabangan gumikan sa sitwasyon sa coronavirus.
Iya kining gituyo aron ang mga empleyado sa barangay dili maduhigan nga sila nidawat sa special amelioration program.
“Ako willing ko mohatag sa akong sweldo sa buwan sa Abril hangtud sa November aron bahinon sa mga empleyado sa barangay nga tabangonon sab,” matud ni Gullas.
Matud sa mayor nga ang maong programa iya sa Department of Social Welfare and Development apan ang matag barangay maoy motabang sa pagpanglista.
Iyang gusto nga dili gyud ilista ang taga barangay sa SAP aron walay daghang estorya nga madungog nga gipili nila ang ilang hatagan.
“Naghimo lang mi og guidelines nga amo uban sa mga kapitan ug mao ni ang among nasabotan,” nagkanayon si Gullas.
Iya sab gihangyo ang tanan nga magsinabtanay tungod kay dili man ang tanan makadawat niini gumikan kay ang mas nagkinahanglan man gyud ang mahatagan base sab sa guidelines sa DSWD. /GMR (BANATNEWS)
- Latest
