Speed limit, mag mask gyud higpit ipatuman
CEBU, Philippines — Ipatuman dayon sa Cebu City Police Office ang speed limit sa kadalanan sa Dakbayan sa Sugbo human nabantayan nga grabe kaayong makapadagan ang mga sakyanan ug motorsiklo karon nga menus na kaayo ang mga sakyanan sa dalan nunot sa gipatumang enhanced community quarantine tungod sa coronavirus (COVID19).
Si CCPO Director Police Colonel Hector Grijaldo miingon nga gimando ni Cebu City Mayor Edgardo Labella ang pagpatuman og speed limit sa mga sakyanan.
Ang speed limit kutob lang sa 20-30 kph sa mga gagmay’ng karsada sa dakbayan ug 40-60 kph sa mga National Roads.
Kini aron sab paglikay nga maggara-gara ang mga motorista sa ilang pagpadagan ug makadisgrasya na hinuon ilabi na nga daghang mga tawong gikan nangompra ang maglakaw sa kadalanan kay wala nay pasaheroang gipabiyahe.
Gitahasan ni Grijaldo ang Traffic Patrol Group (TPG) uban ang Cebu City Traffic Office (CCTO) nga mopatuman niini pinaagi sa pagsita ug pagdakop niadtong malapason.
Sa pikas bahin, ipatuman na sab ang No Mask, No Entry Policy sa mga pampublikong lugar,
wala pa hinuoy mando nga dakpon ang nakalapas niini apan sitahon sila ug dili pagawson.
Si Grijaldo miingon nga sa ilang monitoring mas nigamay nalang gyud ang mga tawong naa sa gawas ug sa gihapon padayon silang nanawagan sa katawhan nga mokooperar. /IBM (BANATNEWS)
- Latest
