‘Border control’ gisalig ni Gwen sa mga siyudad

CEBU, Philippines — Gisalig ni Gob. Gwendolyn Garcia sa mga mayor sa upat ka dagkung siyudad ang pagpatuman sa border control alang sa mga taga probinsiya nga moadto sa ilang trabaho.

Kini human ang kagamhanan sa Dakbayan sa Sugbo, Mandaue ug Lapu-Lapu nagkauyon nga pasudlon gihapon sa dakbayan ang mga trabahante gikan sa probinsiya lakip sa mga mag-uuma ug mananagat nga dili na kinahanglan ang quarantine pass ug mopakita lang og ID.  Ubos sa executive order ni Garcia, kadto lang mga frontliners ug ubang gikonsiderar nga “essential workers” sa probinsiya ang makaagi sa borders padulong sa Dakbayan sa Sugbo.

Kalibog

Si Talisay City Mayor Gerard Anthony Gullas nalibog tungod sa pressure sa mga tawo nga mangompra o nagtabaho sa Dakbayan sa Sugbo apan nabalaka nga dili na kabalik sa Dakbayan sa Talisay tungod kay wala sila sa exempted nga mga tawo base sa EO sa gobernador.

Lakip sa nalibog ang pipila ka trabahante sa business process outsourcing sa Dakbayan sa Sugbo nga taga probinsiya nga moagi sa Dakbayan sa Mandaue.

“I’ll respect your local autonomy but you are risking the people of Mandaue,” matud ni Garcia labot sa desisyon ni Mayor Jonas Cortes. Anaa sab kang Gullas ang desisyon kun mosunod kini sa ubang siyudad.

“Kung mag-lockdown gani ta, lockdown. Kay kung daghan tang exemption, dili na lang ta mag-lockdown mangadye na lang ta,” matud ni Garcia.

Hinungdan sa pagsirado ni Garcia sa border tungod sa nagsaka nga kaso sa coronavirus disease sa Siyudad sa Sugbo nga niabot na sa 20 ka tawo.

Nabalaka si Garcia nga sa kadaghan sa nagtrabaho sa Dakbayan sa Sugbo nga manguli sa probinsiya ang makadala sa maong sakit.

“We hope that we could come up with a win-win solution, one is for sure, I will always push through the victory of the Cebuanos,” matud ni Garcia.

Dalan gi-disinfect

Gi-disinfect sa kagamhanan sa Siyudad sa Sugbo ang pipila ka dalan batok sa COVID-19 ilabi na kadtong tapokanan sa mga tawo.

Kini naglakip sa may Pasil, dalan Colon, S. Osmeña ug palibot sa Cebu City Hall.

Ang pangulo sa Department of Public Services, Atty. Jigo Dacua, nipasalig nga buhaton kini nila sa tanang kadalanan sa siyudad subay sa kamanduan ni Mayor Edgardo Labella.

Lakip sag gi-disinfect ang mga bus nga gipadagan sa siyudad aron mopasakay sa mga pasahero.

Samtang gipahibawo ni Dacua nga nagsugod na sila og panawat og application sa mga frontliners nga gustong mo-avail sa libreng accommodation nga gitanyag sa pipila ka hotels pinaagi sa first come, first serve basis.

Samtang gipahibawo sab ni Cebu City Market Administrator Jonil Matuguina nga nagpatuman sila og “one entry, one exit point” sa kamerkaduhan sa siyudad sama sa Taboan, Pasil, T. Padilla, Ramos, Pardo ingon man sa Carbon Public Market.

“Same schedule katong naay curfew 8pm to 3am so di sila makatinda pero amoang gi-implement diha giibanan gyud namo mga vendors para maglagyo-lagyo sila,” matud ni Matuguina.

Utlanan gibantayan

Sa laing bahin higpit nga gibantayan ang mga utlanan sa matag barangay sa Dakbayan sa Mandaue.

Naglakip sa mga utlanan nga mga dalan ang gikan sa Barangay Casili sa Lungsod sa Consolacion ug Barangay Cubacub. Decemay P. Padilla, Romeo T. Limpangog/GMR (BANATNEWS)