Abang sa pwesto sa merkado sa mandaue gihunong

CEBU, Philippines — Gihangop sa mga naninda sa merkado publiko sa Dakbayan sa Mandaue ang ordinansa nga naghatag og moratorium sa matag adlaw nga abangan sa pwesto niining panahon sa pagpatuman sa enhanced community quarantine.

Gipadayag sa mga manindahay nga daw mahunong usab ang ilang pagpaninda sa pagpatuman sa ECQ bisan sa vegetable section tungod kay maglisud man sila sa pagpangompra og mga utanon sa Carbon Public Market sa Dakbayan sa Sugbo ilabi na nga sagad sa mga naninda mga senior citizens.

Si Konsehal Jimmy Lumapas nga maoy chairman sa committee on market sa konseho maoy nangamahan sa maong ordinansa.

“The grant of the moratorium of the daily stall rental fees shall retroact to March 30, 2020. Any payments of stall rental which were made within the period of moratorium shall be theretofore considered as advance payment(s) after it shall have been lifted,” matud sa ordinansa.

Sa nasayran nga nunot sa pagpatuman sa ECQ maoy gihimo sa mga nag-okupar sa dry section nga naglakip sa tindahan sa mga panapton, tsinelas ug uban pa ang pagpanirado sa ilang tindahan gawas lang sa bugasan, isdaan, karnehan ug vegetable section. /GMR (BANATNEWS)