CEBU, Philippines — Kun niadtong Huwebes nidagsa ang mga pasahero sa Cebu South Bus Terminal (CSBT), nagmingaw usab kini kagahapong adlawa.
Matud ni Carmen Quijano, ang manager sa CSBT, nga kaadlawon kagahapon nahurot ang mga pasahero human usab nga gitugtan ni Gobernador Gwendolyn Garcia nga makabiyahe ang mga airconditioned nga mga bus ug ma-exempt sa curfew.
Si Quijano niangkon nga wala nasunod ang social distancing tungod sa kabaga sa gidaghanon sa mga tawo.
Apan bisan og nagmingaw kagahapong adlawa, magpadayon gihapon ang ilang operasyon lakip na ang pagpadagan sa mga bus karong adlawa ilabi na nga posibleng aduna pay moapas sa pag-uli sa mga lungsod ug dakbayan sa dili pa hingpit ipatuman ang movement restriction sa Dakbayan sa Sugbo nga magsugod alas 12:01 sa udto karong adlawa.
Kagahapon bisan minus na ang mga tawo sa terminal, nabantayan nga wala gihapon masunod ang social distancing sa mga pashaero nga anaa sa passenger’s lounge nga naghulat sa ilang turno nga makasakay og bus.
Sa Lunes apil na ang mga bus nga dili na magamit isip public transport subay sa pagpatuman na sa movement restriction gawas lang kung ang maong bus i-hire sa local government unit isip service sa mga essential workers sa lungsod. /GMR (BANATNEWS)