CEBU, Philippines — Si Padre Japhet Geonzon, parochial vicar sa Cebu Metropolitan Cathedral niawhag sa katawhan nga gamiton ang ilang home quarantine ngadto sa mga maanindot kaayo nga mga butang ug hunahunaon sa kanunay nga ang Ginoo wala nagsilot hinoon anaa kini kanunay sa katawhan bisan pa man sa hulga covid-19.
Matud ni Geonzon nga niining panahon sa quarantine ang mga ginikanan angay makig-dialogue sa ilang mga anak ug gamiton kini isip bonding nila sulod sa ilang panimalay.
Niawhag usab ni Geonzon nga unta kadtong mga tawo nga adunay ikasarang magpaambit ngadto sa ilang mga silingan kinsa naglisod human nawagtangan og panginabuhian.
Matud usab ni Geonzon nga bisan sa mga kabalaka nga nasinati karon nagpakita gihapon kini sa padayong grasya ug kalooy sa Ginoo sa atong mga kasingkasing.
Si Geonzon atol sa gipahigayon niining wali sa misa niya online sa DyRF1215 nagkanayon nga sa kabalaka ug kahingawa karon nga giatubang aduna gihapoy rason sa pagpadayon sa pagpakabuhi tungod kay ang Ginoo nisaad kanato sa iyang gugma ug kalooy nga angay natong ipaambit sa atong mga kaigsuonan. /BDB (BANATNEWS)