CEBU, Philippines — Nikabat sa 5,089 ka trabahante sa 554 ka establisamento sa Sugbo ang nipaubos karon sa gihimo nga flexible working hours tungod sa hulga sa corona virus disease 2019.
Kini ang gitug-an sa Labor Information Officer sa Department of Labor and Employment (DOLE)-7 Luchel Senarlo-Taniza.
Matud ni Taniza nga nagpadala og notisya ang maong mga kompaniya sa ilang buhatan may kalabutan sa ipahigayon nilang flexible working hours diin lakip usab ang ilang buhatan ang nipatuman niini.
Si Taniza nagkanayon nga sa pagkakaron wala pa gayud silay nadawat nga guidelines sa ilang buhatan alang sa mga apektado nga trabahante tungod sa pagkuyanap sa covid-19.
Gibutyag ni Taniza nga nagpadayon ang ilang profiling ug lakip usab kini nga iduso sa mga kompaniya ug ang educational attainment sa mga apektado nga trabahante.
Adunay posibilidad nga modaghan pa gayud unya ang gidaghanon sa mga trabahante nga apektado ilabi na daghan sa mga magpapatigayon ang nipahibalo nga menos ang ilang mga kalihukan tungod sa mga executive order nga giluwatan sa mga Local Government Unit.
Sa pagkakaron duha pa gihapon ka kompaniya ang niduso sa ilang buhatan nga mohimo og temporary closure sa ilang establisamento diin 80 ka empleyado ang apektado.
Sa pagkakaron padayon niawhag ang DOLE sa mga magpapatigayon og flexible working hours ngadto sa ilang mga trabahante. /BDB (BANATNEWS)