CEBU, Philippines — Dakpon sa kapolisan ug pasakaan og kaso kadtong dili mosunod sa mando sa kagamhanan sa Siyudad sa Sugbo labot sa gipatuman nga general community quarantine.
Kini ang gibutyag ni Cebu City Police Office Director Engelbert Soriano human sa gipagawas nga Executive Order 52 ni Mayor Edgardo Labella.
Tumong niini ang istrikto nga monitoring sa mga border control sa mga entry points sa Dakbayan sa Sugbo.
Gipasabot ni Soriano nga mahimo sila nga makadakop subay sa Republic Act 9271 o ang Quarantine Act of 2004 ug Republic Act 11332 o ang Law of Monitoring and Informing Diseases nga maoy magprotekta sa publiko gikan sa mga sakit nga malikay nga makatapon.
Subay niini giawhag ni Soriano ang katawhan nga mokooperar sa kapolisan ilabi na gyud sa mga security measures nga ipatuman inubanan sa Task Force COVID-19 sa pag-monitor sa panglawas sa publiko.
Checkpoint
Nagpahimutang og 14 ka checkpoints ang CCPO subay sa deklarasyon sa community quarantine.
Uban sa CCPO ang Department of Health ug mga Barangay Health Workers nga maoy mag-monitor sa temperature sa nga mosulod sa siyudad.
“Nag double tasking na din kami, tumutulong na din kami nagka-carry nang mga pasyente, search and rescue pero sa COVID checkpoint kami yung lead agency partnership with DOH, City Health, CDRRMO, LTFRB and other stakeholders,” dugang ni Soriano.
Gitataw sab ni Cebu City Legal Officer Rey Gealon nga posibleng mag-atubang og silot ang magdumili sa pagpaubos sa quarantine kung kini gikinahanglan gyud sa tawo.
Kini gikasabutan atol sa tigum tali sa Inter-Agency Task Force on Emerging Infectious Disease kagahapon sa buntag.
Matud ni Gealon nga seryuso si Labella sa pag-implementar sa EO 52 alang sa pagprotektar sa publiko.
Kagahapong adlawa niepekto ang kamanduan ni Labella kinsa nitataw nga dili kini lockdown o enhanced community quarantine.
Hinoon namatikdan nga nisabot ra ang katawhan ilabi na hangyo nga magpundo una sa balay.
“We have to be prepared, we do not panic but we have to be very extra careful nga gani kining atong mga checkpoint atong gi-uprise, atong gitabangan ang atong task force apil ang kapolisan kay nitabang man gyud sila ug ang military nga checkpoints ang purpose ana dili para mangita og kinsay naghimo og mga criminal acts, illegal things. Ang purpose ana para gyud ma-prevent nato ang spread sa disease,” matud ni Labella.
Dugang ni Labella nga COVID-free gihapon ang Dakbayan sa Sugbo. Rowena D. Capistrano ug Decemay P. Padilla/GMR (BANATNEWS)