Gidauban nga lawas taga Dumanjug
CEBU, Philippines — Nailhan na ang patay’ng lawas sa usa ka lalaki nga gigapos, gipatay ug gidauban sa Labogon, Dakbayan sa Mandaue niadtong Huwebes.
Si Police Staff Master Sergeant Glenn Bordalba sa Presinto 3 sa Mandaue City Police Office niingon nga giila sa igsoon nga babaye ang biktima nga si Gary Pateños Teonis, 33, taga Tapon, Dumanjug.
Matud ni Bordalba nga si Anabelle Teonis maoy niila sa patay’ng lawas nga gipahiluna sa Rolling Hills Funeral Homes sa Banilad sa maong dakbayan.
Sumala pa nga si Anabelle ug ilang pamilya gibati og kabalaka sanglit wala nahiuli sa ilang panimalay ang ilang sakop maong naaghat sila sa pagsusi sa gikatahong patay’ng lawas nga napalgan.
Gitug-an ni Anabelle sa kapolisan nga ang namatay giingong niadto sa ilang paryente sa Dakbayan sa Lapu-Lapu kay adunay ihatud apan wala na kini nahiuli sa ilang panimalay.
Gipaabot sa kapolisan ang resulta sa autopsy sa patay’ng lawas sa pagsuta sa hinungdan sa kamatayon sa wala gidauban sa mga mamumuno. /GMR (BANATNEWS)
- Latest
