CEBU, Philippines — Mopatuman og price ceiling sa tanang basic commodities sa tibuok Lalawigan sa Sugbo.
Kini aron masiguro nga walay mopasaka og presyo sa bugas ug ubang basic commodities tungod sa hulga sa coronavirus disease (COVID-19).
Atol sa gipahigayong tigom ni Gobernador Gwendolyn Garcia uban sa Provincial Price Monitoring Council kagahapon iyang gipahimangnoan ang National Food Authority (NFA) nga pahimangnoan usab ang mga rice dealers nga dili mopasaka og presyo sa bugas.
Kini human nakadawat og report si Garcia nga adunay pagsaka sa presyo sa bugas diha sa Lungsod sa Barili ug Dakbayan sa Carcar.
Si Garcia nagkanayon nga moestablisar sila karon og price ceiling sa tanang basic commodities diin paluyohan kini og executive order.
Matud ni Garcia ang mga rice dealer nga molapas sa maong kamandoan irekomendar nga i-revoke ang permit niini.
Gimandoan usab ni Garcia ang NFA nga mopagawas lang kini og supply nga igo ra sa kinahanglan ug dili maghinobra.
Matud usab ni Garcia nga ang Probinsiya sa Sugbo adunay igo nga bugas nga molungtad pa og tulo ka bulan.
Giingong ang mga mag-hoard og basic commodities ang masilotan usab.
Giawhag ni Garcia nga mo-report diha sa iyang buhatan o sa Department of Trade and Industry kong adunay mga nahibaw-an nga nag-hoard og basic commodities.
Ang mga local government unit ang motabang usab sa pag-monitor. /BDB (BANATNEWS)