13 anyos nga babaye gibugaw sa 18 anyos

CEBU, Philippines — Naluwas  sa  entrapment operation ang usa  ka 13 anyos nga babaye samtang gidakop ang 18 anyos nga babayeng giingong maoy nagbugaw sa bata diha sa us aka motel sa Dakbayan sa Lapu-Lapu sa miaging gabii.

Si Police Lieutenant Albe Codilla, hepe sa Women and Children Protection Desk (WCPD)   sa  Lapu-Lapu City Police Office (LLCPO) miingon nga ang ilang gidakop nga 18  anyos ilang pasakaan og kaso samtang ang bata gipasa na nila ang pagatiman City’s Home Care Center nga gidumala   sa  Department of Social Welfare and Development.

Ang maong batang babaye  giingong tinun-an sa usa  ka public elementary sa maong dakbayan.

Matud  pa  ni Codilla dunay nakahatag kanila og impormasyon bahin sa babayeng naila ng nalambigit sa prostitusyon nga nagdala kini og menor de edad nga babaye sulod  sa usa ka motel sa Barangay Pajo aron ibugaw.

Hinungdan nga giadto dayon nila ang maong establisamento kauban ang WCPD personnel, CIB  sa LLCPO ug mga sakop  sa Criminal Investigation and Detection Group 7 ug gilusad ang entrapment operation nga kunohay dunay kustomer nga gusto og bata.

Si Codilla miingon nga ang 18 anyos giingong maoy nidawat sa P5 mil nga gibayad sa police decoy alang sa pagpakighilawas  sa 13-anyos nga babaye.

Ang Social Worker sa dakbayan  nga si  Virginia Dihayco miingon nga dugay na nilang namatikdan  ang maong 18-anyos nga babaye nga magsuroysuroy diha Poblacion ug Pajo kuyog ang pipila ka minor nga mga babaye. Si Dihayco  miingon nga niadtong pang miaging semana ilang gipahimangnoan ang maong  grupo nga dili mogawas  sa  ilang panimalay  panahon  sa gabii.

Pasakaan  og kasong kalapasan  sa Republic Act . 9208  o ang  Anti-Human Trafficking Law  ang  dinakpan nga bugaw nga babaye nga nagtingkagol  na karon sa sulod  sa ilang detention cell. /IBM (BANATNEWS)