Balay sa kabus gitukod sa parokya sa Samboan

CEBU, Philippines — Gihangop sa mga kabus nga wala gyuy sarang ikagasto sa pagpatukod og balay ang proyekto sa St. Michael the Archangel Parish sa Lungsod sa Samboan.

Ang proyekto nga Balay sa Kabus o Balay sa Paglaum Program subay kini sa umaabot nga 500 Years of Christianity sa Pilipinas.

Matud ni Fr. Eduardo Ventic, kura paruko sa lungsod, nga ang proyekto inubanan sa iyang Parish Pastoral Council nga aduna silay buhaton alang sa tulo ka tuig nga programa kuyog ang Commission on Mission sa Archdiocese of Cebu ug sa Visayas Mission Confraternity Incorporated.

Dugang pa ni Ventic nga summer pa unta sugdan ang maong proyekto sa upat ka barangay gikan sa 12 nga sakop sa iyang parokya ang pabarugan nila og balay alang sa mga kabus nga walay sarang ikagasto aron makabaton og desinte nga kapuy-an.

Ang mga barangay mao ang Suba, Bulangsuran, Canyorong ug Bonbon diin mas nauna ang barangay sa nakapatukod na sa dili mominus lima ka panimalay nga daku inugurahan karong adlawa uban sa kadagkuan sa Commission on Mission ug VMCI.

Sumala pa ni Ventic nga mas nauna nakapatukod ang Barangay Suba tungod kay sayon ra ang pagdala sa mga materyales diin orihinal unta nga plano tag-upat lang ka balay matag barangay apan base sa pakisusi sa mga lugar mas daghan gyud ang nagkinahanglan og tinud-anay nga tabang ug nag-ilaid gayud sa kalisud kay walay mga trabaho ug adunay mga kabilinggan ilabi na mga tiguwang na ang uban.

Si Ventic nitug-an nga ang kantidad sa maong balay P30 mil ngadto sa P40 mil matag usa diin karon ang abag sa parokya mao ang pagsuhol ug pagpakaon sa mga panday nga nagtrabaho sa maong mga panimalay.

Ang kura nitug-an nga ang maong proyekto nagpakita kini ngadto sa mga tawo nga bisan sa kakabus anaa gyud si Kristo nga andam motabang ilabi na sa mas nanginahanglan.

Samtang si Rosemarie Cerna, PPC treasurer, nitug-an nga sila maoy nangita kung kinsa ang malakip sa maong proyekto sa ilang barangay ilabi na kadtong wala gayuy sarang mahimo.

Gibutyag ni Cerna nga ang counterpart nila sa kapilya mao ra gyud ang pag-monitor sa gitukod nga mga panimalay tungod kay ang parokya ug mga kaabag niini sa proyekto mao man ang nigasto.

Usa ka 74-anyos nga si Bienvenido Topia nga nalakip sa nakapahimulos sa proyekto kinsa adunay kabilinggan sa panglawas ang mapasalamaton sa nagpaluyo sa maong proyekto tungod kay aduna naman siyay matawag nga iyang balay.

Mapasalamaton si Topia sa mga panday nga nihimo sa iyang balay ug labaw na ngadto sa Ginoo.

Ang balay adunay sukod nga 8x10 o 12x10 depende sa pamilya nga mopuyo niini. /GMR (BANATNEWS)