Dayon-dayon gidakop, 70 ka tawo arestado

CEBU, Philippines — Giseryuso sa kapolisan ang kampanya niini batok sa ilegal nga drugas human nga 70 ka tawo ang gidakop  sa mga sakop sa Police Regional Office 7 Regional Special Operations Group (RSOG) sa dalan Colon sa Barangay Pahina- Central sa Dakbayan sa Sugbo tungod sa sugal.

Matud ni Police Captain Romeo Caacoy hepe sa RSOG7 nga nakadawat sila og reklamo gikan sa mga residente ug pribadong eskwelahan tungod sa grabing saba nga mugna sa duwa ug sugal.

Sumala pa usa ka semana nilang gipanid-an ang maong lugar ug matag hapon dunay magduwa og dayondayon nga dunay pusta.

“Dagko kaayo ang ilang sugal, unya nakadawat ta og reklamo gikan sa eskwelahan tungod ky makadistrubo sa klase kay saba gyud kaayo,”matud pa ni Caacoy.

Sumala pa gikan sa mga nagkalain-laing barangay ang mga manuwa didto ug moabot tag P5 mil ngadto P10 mil ang pusta.

Matud ni Ced, 40 anyos (dili niya tinuod nga pangalan) usa sa mga gidakop nagtan-aw ra siya sa duwa dihang gironda ang lugar sa kapolisan.

Hinuon giangkon niya nga mosakay siya og tag P100 ngadto P200 matag duwa.

“Sa kadugayon na anang volleyball-an giingnan nalang unta mi nga undangon na kay daghan na ang nagreklamo, dapat sa una pa, naundang na unta na. Na surprise nalang gyud mi nga hasta nga kaming manan-away gidakop,”dugang pa ni Ced.

Nakuha sa maong operasyon mao ang P30 mil nga kwarta gikan sa mga gidakop.

Si Caacoy miingon nga bisan unsa pa nga duwa basta pustahanay og kwarta makonsiderar kini nga sugal.

Ang mga dinakpan naa gibutang sa Police Regional Office 7 alang sa pagpasaka og kaso ugmang adlawa.

Samtang sa Presinto 3  sa Mandaue  City  Police  Office (MCPO), walo ka tawo ang gidakop tungod sa pagsugal sa billiards game diha sa bilyaran sa Sitio  Kanipaan, sa Barangay  Basak sa miaging gabii.

Si Police Captain Arnel Coloscos  nga maoy hepe sa Presinto 3 sa MCPO dunay misumbong kanila nga dinagko na ang pusta sa bilyaran.

Ang mga dinakpan pasakaan og kaso ugmang adlawa nga paglapas sa Presidential Decree 1602 o Illegal nga sugal. Romeo Limpangog/IBM (BANATNEWS)