Quarry operators posibleng dili na isyuhan og permit

CEBU, Philippines — Laing mga quarry operator sa Probinsiya sa Sugbo ang peligrosong dili na maisyuhan og permit human nga subli kining nilapas sa lagda nga gi-set sa Kapitolyo kalabot sa quarry operations sa probinsya.

Matud ni Gobernador Gwendolyn Garcia nga adunay duha ka operators nga nasayran niya nga nilapas sa gitugot nga limitasyon sa pag-quarry human sa ilang gipahigayon nga inspection.

Im seeing nga nag-extract sila og beyond the allowed volume. So there›s a possibility nga naay uban nga not only revoke dili na gyud nato isyuhan», matud ni Garcia.

Gibutyag ni Garcia nga adunay duha nga nakalapas nga taga south ug north apan wala kini hinganli pa ni Garcia.

Si Garcia makigtagbo kini og balik sa mga quarry operator sa lalawigan diin iyang ipresentar ang resulta sa inspection nga gihimo sa Kapitolyo.

Ang Kapitolyo nibalik kini og hatag og permit sa pipila ka quarry operators sa Probinsiya sa Sugbo human nga ang uban kanila naka-comply sa mga rekisitos o sa lagda sa probinsiya kalabot sa quarry operations apil na ang mga bayranan niini.  – Le Phyllis F. Antojado/BDB

Hepe sa TCPS mobisita sa mga gwardiya sa mga establisamento

Pakigkitaan sa hepe sa kapolisan sa Dakbayan sa Talisay ang mga gwardiya sa tanang establisamento aron pahinumduman sa ilang tagsa-tagsa ka trabaho.

Lakip usab niini ang pagpahinumdum kanila nga ang ilang kaugalingong problema o sa trabaho dili tubag nga manglupig sa isig ka tawo.

Matud ni Police Major Gerard Ace Pelare, hepe sa Talisay City Police Station (TCPS) nga ang trabaho sa gwardiya susama lang sa ilaha nga mo protihir sa katawhan ingon man kabtangan nga ilang gibantayan.

Ang pagbaton kanila og armas usa sa mga prebilihiyo busa angay usab kini nilang huna-hunaon kong kanos-a nila kini gamiton.

Si Pelare nagkanayon nga iyang suroyon ang mga gwardiya aron siya mismo ang makahatag sa pahimangno ug pagpahinumdum nga dako sila og papel sa matag buhatan nga ilang gitrabahoan.

Nasayran nga usa ka gwardiya didto sa kaulohan ang nabutang sa nasudnong balita human nga nang hostage og pipila ka kawani.

Ang rason sa maong gwardiya mao ang suliran niya sa kadagkoan sa ilang kompaniya.

Dugang ni Pelare nga ang matag problema adunay kasulbaran ug dili lang kini ipaagi sa bayolente nga pamaagi tungod kay adunay balaod nga pwedeng kadangpan. /BDB (BANATNEWS)