Cebu City Jail planong ibalhin
CEBU, Philippines — Alang kang Cebu City Mayor Edgardo Labella, angayan na gyud ibalhin ang Cebu City Jail gumikan kay gikinahanglan ang daku nga pasilidad alang sa mga Persons Deprived of Liberty kinsa naghuot karon sa CCJ.
Usa sa gitan-aw nga lugar sa mayor nga pwedeng balhinan sa city jail ang Barangay Guba, bukirang bahin sa Siyudad sa Sugbo.
“It needs a bigger facility and it needs to have something that would prevent congestion and healthier space, pila man na diha, Guba has about 20 hectares,” matud ni Labella. Gihulagway ni Labella nga sa iyang administrasyon usa gyud sa iyang plano ang pagtukod og laing city jail diin mahimo ang mogasto niini ang lokal nga kagamhanan o kaha mangayo og tabang sa nasyonal.
Sumala pa ni Labella nga ang kasamtangan nga sitwasyon karon sa CCJ “unhealthy, unsanitary” ug matud pa makapasamot kini sa problema sama sa pagpalusot og kontrabando ingon man may labot sa kahimtang sa panglawas.
“You see it can only accommodate ideally 1,000 to 2,000, how many are there 6,000,” matud ni Labella.
Kun pananglitan matuman ang maong plano ni Labella, ang mayor nagplano nga ang pasilidad nga anaa sa may Barangay Kalunasan mahimong pasilidad alang sa kababayen-an nga PDL o kaha sa Operation Second Chance. Tinguha ni Labella nga karong tuiga mahitabo ang maong plano. /GMR (BANATNEWS)
- Latest
