CEBU, Philippines – Gilimpyohan sa Ombudsman ang magtiayong Vicente ug Maria Luisa Loot sa pasangil nga duna kini mga kadudahan nga bahandi nga dili maesplikar kung diin gikan.
Gibasura sa Ombudsman ang kasong gisang-at sa Task Force 5, Office of the Deputy Ombudsman for the Military and Other Law Enforcement Offices niadtong Hulyo 24, 2017 batok ni Vicente, retiradong heneral, ug asawa nga si Maria Luisa, kinsa pareho silang kanhi mayor sa Lungsod sa Daanbantayan.
Si Vicente gipasanginlan nga dunay unexplained wealth nga P41.5 milyones sulod sa tuig 2005 hangtud 2015 samtang P18.7 milyones sab kang Maria Luisa sulod sa 1986 hangtud 1990 diin pareho nilang gihimakak.
Si Vicente nagsilbi sa Philippine Constabulary ug Philippine National Police gikan sa 1982 hangtud 2015 ug napiling mayor sa Daanbantayan niadtong Hunyo 30, 2016.
Si Maria Luisa gitudlong konsehal sa Daanbantayan sa Abril 16, 1986 hangtud Pebrero 2, 1998 dayun napiling bise mayor ug mayor sa nisunod nga mga termino hangtud sa Hunyo 30, 2013.
“Notwithstanding, complainant failed to satisfy the requirements to establish prima facie presumption that respondents’ wealth is unlawfully acquired,” pagbasa sa 26 ka pahina na Joint Resolution nga pinetsahan og Enero 27, 2020 ug aprobado ni Deputy Ombudsman for Luzon Cornelio Somido.
Matud sa Special Panel of Investigators nga ang kwentada sa reklamante walay basehanan ug wala magtukma sa tinuod nga kahimtang sa panalapi sa magtiayong Loot.
Nasuta nga si Maria Luisa daghan na og mga kabtangan sa wala pa siya gitudlo nga konsehal sa lungsod gikan sa iyang pagpanarbaho sa Japan ug napundar nga negosyo.
“This Office resolves to dismiss the forfeiture complaint against Ma. Luisa for alleged unexplained wealth in the amount of P18,735,022.00 covering the period of 1986 to 1990 for lack of basis,” matud sa mga imbestigador.
Sa habig ni Vicente, matud sa Ombudsman nga angay unta nga gisuta sa reklamante ang Statement of Assets, Liabilities and Net worth (SALN) sa wala pa ang 2005 aron masuta kung pila ang net worth niini sa sinugdanan.
“Unfortunately, complainant’s computation of alleged unexplained wealth is vague, inaccurate and misleading that the prima facie presumption is not sustained,” matud sa resolusyon.
Gibasura sab sa Ombudsman ang mga kasong kriminal batok sa magtiayong Loot may kalabutan sa maong reklamo tungod sa kakuwang sa basehanan. (BANAT NEWS)