CEBU, Philippines — Gipasidunggan ang usa ka mananagat human niuli sa nakit-an niya nga jetski sa kadagatan sa Dakbayan sa Talisay.
Si Christopher Mabia nga taga Sitio Rattan, Barangay Tanke sa maong dakbayan nanagat niadtong Lunes sa buntag dihang iyang nakita ang jetski nga naglutaw nga walay sakay nga tawo.
Wa maglangay si Mabia iya kining giguroy paingon sa mamá aron iuli sa tag-iya niini pinaagi sa pagsumbong sa kapolisan.
Matud pa ni Police Major Gerard Ace Pelare, hepe sa sa Talisay City Police Station, nga dali nila nga gisubay kung kinsa ang tag-iya niini hangtud nga nahibaw-an nga iya diay sa Nalusuan Island Resort and Marine Sanctuary Water Sports Center Cebu.
Ang mga representante sa maong resort dali nga niadto sa Talisay City Police Station ug nipasabot nga nadala sa kusog nga sulog ang jetski hangtud nga nahanaw sa ilang panan-aw.
Gipahalipayan si Mabia sa iyang kamatinud-anon bisan pa man sa ilang estado sa kinabuhi.
Si Mabia nag-adlaw og P300 apan wala siya nagpatintal nga ibaligya ang jetski nga mokantidad og P700,000.
Nagkanayon si Pelare nga si Mabia maoy usa sa mga residente sa lugar nga naghatag og maayong dungog. /GMR (BANATNEWS)