CEBU, Philippines — Nihangyo ang Cebu City Transportation Office sa Visayan Electric Company sa pagtangtang sa pipila ka poste nga nag-ali sa kadalanan nga peligro sa mga motorista.
Kini subay sa mando sa Presidente pinaagi sa DILG Memorandum No. 2019-121 niadtong Hulyo 29, 2019 sa paglimpyo sa kadalanan sa tanang ilegal nga istruktura ug babag.
Si Alma Casimero sa CCTO ang nipadala na og suwat kang Engineer Daryl Bonbon, manager-service retail service division sa VECO niadtong Pebrero 4, 2020.
Si Attorney Rey Gealon, executive director sa operasyon sa trapiko, niingon nga ang pagtangtang sa mga poste kinahanglan nga unahon labi na sa kahimtang sa pagdumala sa trapiko.
“With these posts removed, one lane of these widened roads would be rendered serviceable,” matud ni Gealon.
Matud niya nga sa pagkuha sa mga poste, mohatag kini og dugang nga luna alang sa dugang nga agianan nga nagpasabot nga mas maayo nga dagan sa trapiko.
“We are appealing to VECO to remove them without delay,” sumala pa ni Gealon. /GMR (BANATNEWS)