CEBU, Philippines — Gawas sa mga sakyanan, apil ang mga printers sa mga buhatan sa Kapitolyo ang abangan na lang sa kagamhanan sa Probinsiya sa Sugbo.
Ang maong lakang pamaagi kini sa administrasyon ni Gobernador Gwendolyn Garcia aron makadaginot ang Kapitolyo. “Monthly magbayad na lang ta, dili na ta sige magpalit og ink, unya ato na sad gi-limit ang number of printers. Kadto rang necessary kay sa pagkakaron I was shocked to learn that we have 600 printers,” matud ni Garcia.
Plano sa Kapitolyo nga ang mga printers karon sa mga opisina i-bid out ug naghuwat na lang sila og clearance gikan sa Commission on Audit (COA).
Sa pagkakaron giproseso na ang bidding alang sa mo-supply sa multifunction printer nga gawas nga moprinta, mo-photocopy ug mo-scan alang sa mga buhatan nga mas nanginahanglan niini.
“So ang tagaan na lang heavy duty nga photocopier. Kadto na lang mga opisina nga necessary na lang kaayo for example katong secretary to the sanggunian,” matud sa gobernador. /GMR (BANATNEWS)