Mga otoridad nag-clean up drive sa Tanke

CEBU, Philippines — Ang kapolisan, kabomberohan, Philippine Drug Enforcement Agency, kagamhanan sa Dakbayan sa Talisay ug opisyales sa barangay ang nipahigayon og clean up drive kagahapon sa buntag diha sa Barangay Tanke.

Kini maoy usa sa mga programa aron mawagtang na ang ilegal nga drugas sa maong lugar.

Si Police Major Gerard Ace Pelare, hepe sa Talisay City Police Station nagkanayon nga padayon gihapon ang ilang nagkalainlaing programa sa maong lugar diin mao kini ang hinungdan nga nakita nila ang kausaban.

Matud ni Pelare nga pahimuslan nila ang ilang nasugdan diin ang simpatiya sa katawhan naa na karon kanila sa dihang gihimo nila ang house visitation.

Ang kapolisan namati kini sa mga yangongo sa mga molupyo sa lugar diin motabang sila sa pag-ayo sa kumon nga pansayan ug pakigkitaan nila ang mga mananagat aron ipahiubos kini sa profiling diin tumong niini nga dili magamit sa transportasyon sa ilegal nga drugas ang mga mananagat.

Sa nasayran, gideklara nga lock down ang Barangay Tanke ug San Roque sa mga tawo nga nalambigit sa ginadili nga drugas.

Ug tungod sa subsob nga pagpatuman sa nagkalainlaing programa nikunhod ang gidaghanon sa mga tawo nga madakpan kinsa nalambigit sa ilegal. /BDB (BANATNEWS)