Polis ug enforcers gipahimangnoan nga manglimpiyo
CEBU, Philippines — Gipahimangnoan sa pangulo sa kapolisan ug pangulo sa City of Talisay-Traffic Operation Development Authority (CT-TODA) ang ilang mga sakop sa kanunay nga paghugas sa kamot, saktong hygiene ug saktong pahuway aron dili dayon dali nga matakboyan og mga sakit.
Kini human nga adunay pipila ka tawo ang gipaubos sa person under investigation (PUI) ug person under monitoring (PUM) gumikan sa 2019 novel corona virus.
Gani sa Dakbayan sa Talisay adunay gipaubos sa PUM gumikan kay gikan kini sa mga nasud nga Taiwan, Macau, Hong Kong ug China. Si Jonathan Tumulak, hepe sa CT-TODA nibutyag nga bisan og wala siya mohatag og kamandoan ang iyang mga sakop magsul-ob gyud kini og face mask tungod kay matag adlaw anaa kini sa kadalanan nagsugasong sa abog.
Si Tumulak niawhag sa iyang mga sakop nga labing maayo kong motumar usab sila kanunay og vitamins aron permamente silang himsog.
Samtang si Police Major Gerard Ace Pelare, hepe sa kapolisan sa siyudad nibutyag nga susama ra usab ang iyang gipahimangno sa iyang mga sakop nga manglimpiyo sa ilang lawas ug ipaabot usab kini sa ilang pamilya aron malayo usab sila sa mga sakit.
Si Pelare niawhag usab kini nga dili angayang mag-panic tungod kay ang gobiyerno nigama kini og mga lakang kalabot sa virus. /BDB (BANATNEWS)
- Latest
