Responders makig-alayon sa DOH

CEBU, Philippines – Giangkon sa pangulo sa City Disaster Risk Reduction and Management Office sa Dakbayan sa Talisay nga dili sila basta-basta moresponde og pasyente nga dunay sintomas sa 2019-novel Corona Virus.

Si Alvin Santillana nibutyag nga gihatagan na sila og mga protocol ni Dr. Lino Alanzado, pangulo sa City Health Office, sa ilang buhaton kung pananglit adunay panghitabo nga sama niini aron malikay sila sa close contact sa pasyente.

Nagkanayon si Santillana nga wala silay laing buhaton kun dili ang pagpakig-alayon dayun ni Alanzado sa Department of Health.

Usa ka babaye nga Talisaynon ang gipaubos sa person under monitoring gumikan kay gikan kini siya sa nasud sa Taiwan, Macau, China ug Hongkong.

Hinoon si Alanzado nipasabot nga walay sintomas sa makalilisang nga virus ang maong babaye apan gipaubos kini sa house quarantine sulod sa 14 ka adlaw. – Gabriel C. Bonjoc/GMR

GPS tracker ibutang sa mag-home quarantine

Gitinguha ni Lapu-Lapu City Mayor Junard “Ahong” Chan ang paggamit sa GPS House Arrest Ankle Bracelet trackers sa pag-monitor sa mga ipaubos sa home quarantine.

Matud ni Chan nga ilang gamiton ang P30 milyones nga disaster preparedness fund sa 2019 sa pagpamalit sa maong mga gadgets nga itaud sa bukton niadtong mga tawo nga ipaubos sa person under monitoring ug ikonek ngadto sa City Nerve Center.

Motingug ang maong gadgets sa higayon nga tangtangon kini sa lawas sa tawo nga gitauran.

Ang siyudad adunay 100-bed capacity mga pribadong tambalanan nga andam sa mga persons under investigation ug kadtong mga tawo nga magpakita og sintomas sa maong sakit.

Samtang tinguha sa Bohol Provincial Police Office nga moumol og grupo nga motutok sa pagsanta sa hulga sa nCoV sa probinsiya.

Kini human nakompirmar nga may nagpositibo nga Chinese national nga niabot sa Bohol.

Matud ni BPPO Director Jonathan Cabal nga wala pay direktiba gikan sa ilang labaw alang sa contact tracing.

Ang pag-umol og team paghatag kini og tabang sa Department of Health. Sheriza Mae R. Uy/GMR (BANAT NEWS)