122 ka sakyanan gi-clamp sa usa ka gabii

CEBU, Philippines — Gi-clamp ang 122 ka sakyanan nga ilegal nga nag-parking sa mga dalan sa Dakbayan sa Sugbo atol sa Operation Big Daddy sa Cebu City Transportation Office gikan sa tungang gabii sa Huwebes hangtud kagahapon sa kaadlawon.

Ang CCTO nakadawat og daghang reklamo may kalabutan sa illegal night parking sa kadalanan sa dakbayan hinungdan sa pagpahigayon sa maong operation bisan wala nalukop tanang barangay.

Ang multa sa matag sakyanan nga na-clamp tag P1,500 kung walay lain nga kalapasan nga nahimo. Samtang dili magmahay ang mga traysikol driver nga badlungon nga padayong gireklamo sa Dakbayan sa Talisay sa higayon nga mohimo og operasyon ang mga sakop sa City of Talisay-Traffic Operation Development Authority.

Ang reklamo naglakip sa trip cutting o dili mohatud sa ilang sakto nga rota nga giingong nagpadayon ug nadugangan sa pagpangayo og taas nga plitehan.

Gitumbok ni Jonathan Tumulak, traffic czar sa dakbayan, ang mga traysikol nga mobiyahe sa Barangay Linao ug Bulacao. Gabriel C. Bonjoc/GMR (BANATNEWS)