Mga baktin nga gilabay gihiling sa CVO

CEBU, Philippines — Gisusi sa kawani sa City Veterinarian Office (CVO) ang tulo ka baktin nga gilabay diha sa kahumayan sa Sitio Cabutoy, Barangay Pooc, Dakbayan sa Talisay niadtong Miyerkules sa buntag.

Si Mary Thesa Lorraine Alo, city veterinarian sa siyudad nagkanayon nga nitawag sa ilang buhatan si Kapitan Cuenco Manreal sa Barangay Pooc human nakakita sa tulo ka baktin nga gibiyaan lang diha sa daplin. Ang mga baktin gikuha sa mga sakop sa CVO ug gihiling kini. Matud ni Alo nga limpiyo ra ang internal organs sa mga baktin dihang iyaha kining giablihan ang tiyan. Matud ni Alo nga gisiguro lang sa ilang buhatan nga walay mga delikadong sakit nga dala ang mga baktin.

Ang CVO subsob ang kampaniya niini batok sa African Swine Fever (ASF) ug gibantayan nila nga adunay makasulod nga karne sa siyudad nga nagdala sa maong sakit. – Gabriel C. Bonjoc/BDB

DSWD wala  magsugo og  pang-rekrut

Ang kadagkuan sa Department of Social Welfare and Development (DSWD)-7 subling nipahimangno sa katawhan nga dili makiglambigit sa mga tawo nga nagpakaaron- ingnon nga sakop sa DSWD.

Giingong ang maong mga tawo aduna kini dala nga form nga adunay Malasakit Center Logo ug MRRD Logo nga mang-recruit diin papermahan sa ilang na-recruit ang maong form ug mangayo og P100.

Base sa taho nga nadawat sa DSWD-7 adunay nahitabo niini nga insidente ngadto sa Guildulman, Probinsiya sa Bohol.

Matud sa direktor sa DSWD-7 Rebecca Geamala nga walay kalabutan ang ilang buhatan niini ug giawhag nila ang publiko nga magmabinantayon kanunay.

Giawhag usab ni Geamala ang katawhan nga motaho dayon ngadto sa kapolisan kong adunay mang-recruit kanila gamit ang pangalan sa ilang ahensiya. /BDB (BANATNEWS)