Mga establisamento sa Mandaue inspeksiyonon

CEBU, Philippines —  Mopahigayon  og kinalit nga  pag-inspeksiyon sa mga establisamento sa Dakbayan  sa Mandaue  ang kagamhanan sa siyudad nunot  usab  sa pagsugod na  sa ilang post-audit nga pagahimuon. Si Atty. August  Lizer  Malate, hepe  sa Business Permit  and Licensing  Office (BPLO)  sa Dakbayan  sa Mandaue  nibutyag nga ang ilang pagahimuon pagsuta kon nitukma ba  ang natala sa ilang pagkuha og business permit. 

Matud ni Malate nga ilang unahon sa pag-inspeksiyon kadtong mga patigayon nga anaa sa ilang negatibo nga listahan nga wala pa makakompleto sa ilang requirements. 

Nasayran nga ang  renewal sa business  permit  sa mga patigayon sa Dakbayan  sa Mandaue gisugdan niadtong Enero 2, 2020  ug  hingpit usab kining natapos sa Enero  20, 2020. Apan ang mga napakyas  sa pag-renew  sa ilang business permit  sa gikatakdang petsa niining bulan sa Enero  mahimo pa gihapon sila nga maka-renew apan makabayad na sila og multa tungod sa paglapas og mga adlaw sa pag-renew sa ilang business permit.

Matud usab ni Malate nga naghimo sila og bag-o nga pamaagi alang sa paspas nga pagproseso sa renewal sa business permit. Gibanabana ni Malate nga nikabat ngadto sa 17 ,000 ang gidaghanon sa mga  magpapatigayon  sa dakbayan  ug giingong ubay-ubay pa usab ang napakyas  sa pagsumitir  sa mga gikinahanglang nga rekisitos. Dugang ni Malate nga human  sa  renewal  sa mga business  permit niining bulan  sa Enero 2020 molibot sila sa tibuok dakbayan aron moinspeksiyon sa tanan nga patigayon.  BDB (BANATNEWS)