Kapolisan malampuson sa seguridad nga gipatuman

CEBU, Philippines — Nagmalampuson ang Cebu City Police Office (CCPO) sa seguridad nga gipatuman atol sa kapistahan ni Señor Santo Niño.

Kini maoy gibutyag ni CCPO Director, Police Colonel Engelbert Soriano, subay sa kapin usa ka buwan nga pagpangadam sa kapistahan.

Dugang pa ni Soriano nga mapasalamaton siya sa kalampusan ilabi na sa publiko sa ilang kooperasyon.

Una kini nga higayon nga nisalmot sa higanteng festival si Soriano ug siya usab ang nangulo sa pagseguro sa seguridad ilabi na nga nitambong si Presidente Rodrigo Duterte.

Mokabat usab ngadto sa 2 milyones ka tawo ang gibana-bana nga nisaksi sa kapistahan.

Kini base sa ihap sa usa ka ekipo nga gipanag-iya sa Cebu City Disaster Risk Reduction and Management Office (CCDRRMO) nga maoy gigamit.

Minus ang nitambong sa kapistahan karong tuiga itandi niadtong 2019 diin gibana-bana nga niabot sa 3.5 milyones ang nisaksi niini.

Gibutayag usab ni Soriano nga ang 6,000 ka polis nga gipakatap sa tanan nga kalihukan daku kini nga tabang nga minus ang natala sa mga petty crimes sama sa pagpangawat ug uban pa.

Bisan pa man adunay mga Taiwanese national nga nidangop sa Abellana Police Station aron pagpatabang sa kapolisan sa pagkawala sa ilang cellphone, sa kinatibuk-an gihulagway sa kapolisan nga hapsay ug malinawon ang kalihukan.  GMR (BANATNEWS)