CEBU, Philippines — Sugod sa sunod semana, pangdakpon na usab ang mga drayber sa Angkas ug tanang mga motorsiklong mamasahero human nga girekomendar sa technical working group ang pagpahunong na sa pilot test nga nagtugot kanilang makapamasahero.
Gipahibalo ni Land Transportation Franchising and Regulatory Board member Antonio Gardiola Jr., ang TWG mirekomendar niini apan walay konklusyon nga gipagawas bahin sa pipila ka buwang pilot test, sumala pa sa report sa Philstar.com.
Tungod sa maong pilot test gihatagan og provisional authority ang Angkas, ug laing duha ka kompanya sa motorcycle taxis nga JoyRide ug Move It nga makapamasahero sa Metro Manila ug Cebu.
“They are all illegal,” Gardiola maoy pamahayag niini sa wala pa magsugod ang public hearing diha sa Senate committee on public services.
Pinaagi unta sa pilot test makita kun luwas ba gyung himuong pasaheroan ang motorsiklo, ug pinaagi sa matigom nga impormasyon nga ipasa sa TWG sa Kongreso, anha basihan kun amendahan ang Traffic Code of the Philippines nga nagdili sa mga motorsiklo nga gamitong pasaheroan. Atubangan sa mga senador, gipahibalo ni Gadiola nga aprubado ni Transportation Secretary Arthur Tugade ang rekomendasyon sa TWG.
Gipasabot sab niya nga sa pilot test, ang safety lang sa mga pasahero maoy gitan-aw ug walay labot kun unsay epekto niini ngadto sa panginabuhi sa mga drayber.
Sa iyang bahin, gipangasab-an ni Senador Grace Poe, chairwoman sa Senate Committee on Public Services, ang inter-agency TWG tungod sa pagrekomendar pagpahunong sa pilot test bisan kuwang pa sila og mga natigom nga mga impormasyon.
“Congress was pressured to pass the law but we lack data. We depended on you but you canceled it instead because you don’t want to do your job,” matud pang Poe.
Kahinumdoman nga niadtong bulan sa Disyembre ra unta kutob ang pilot test apan gi-extend kini hangtud Marso 23 ning tuiga aron makaapil ang laing duha ka kompanya.
Ang Angkas nangangkon nga luwas sakyan ang ilang mga motor, apan ang TWG wala makapagawas og kaugalingong data bahin sa ilang gihimong pagtuon nga gihimo. Gikan sa Wires, IBM (BANATNEWS)