CEBU, Philippines – Gihangop sa mga deboto nga Oponganon ang sayo nga pagdala sa imahen ni Senior Santo Niño ug Birhen sa Regla karong Sabado sa kaadlawon diha sa National Shrine sa Birhen sa Regla sa Barangay Poblacion, Dakbayan sa Lapu-Lapu.
Giingong ang mga deboto mag-atang kini diha sa dalan nga agian sa karo nga sakyan sa mga imahen.
Ang mga imahen magsugat kini diha sa tungatunga nga bahin sa Sergio Osmeña Bridge hangtud na sa pagpaingon ngadto sa simbahan sa Birhen sa Regla.
Si Corazon Bentulan, 52-anyos, taga Barangay Pilipog, Lungsod sa Cordova nibutyag nga bata pa siya kanunay na siyang ubanon sa iyang apohan kaniadto nga mosugat sa imahen hinungdan nga nahimo na usab siyang deboto kang Santo Niño.
Laing deboto ni Senior Santo Niño nga si Ronuelda Largo, 43-anyos, taga Barangay Basak sa Dakbayan sa Lapu-Lapu nibutyag nga ang kalisod sa ilang pagsakay pauli mao ang mga hinungdan nga wala na usab siya motan-aw sa tinuig nga fluvial procession pipila ka mga tuig na ang nakalabay.
Matud ni Largo nga karon kay dad-on kini og sayo sa simbahan sa Birhen sa Regla sa Barangay Poblacion mao nga nadasig na siya nga mosaksi sa fluvial procession.
Si Monsignor Antonio Medida, assistance moderator sa National Shrine of Saint Joseph sa Barangay Centro, Dakbayan sa Mandaue nga nahinabi sa mga tigbalita nibutyag nga ang sayo nga pagdala sa imahen sa Dakbayan sa Lapu-Lapu maoy ilang pagsanong sa hangyo sa kaparian ug mga deboto sa maong dapit.
Matud ni Medida nga kini maoy kabahin sa mga kabag-ohan karon nga ilang gihimo nga sukwahi sa nanglabay nga katuigan nga dad-on sa simbahan sa birhen sa Regla ang Imahen ug mohapit kadiyot sanglit human sa misa sugdan dayon ang tinuig nga fluvial precession. /BDB (BANAT NEWS)