CEBU, Philippines – Sugdan lang una sa duha ka barangay sa Dakbayan sa Talisay ang pagpatuman sa no jaywalking o ang pagdakop sa mga tawo nga magpataka lang og labang sa karsada.
Si Jonathan Tumulak, traffic czar sa siyudad, nibutyag nga iya na nga giduso ang rekomendasyon ngadto ni Konsehal Ferdie Rabaya aron mao na sab kini ang moamendar sa ordinansahon aron masal-ot ang “no jaywalking.”
Nakita ni Tumulak nga nakatampo sa trapiko ang pagpataka og labang sa katawhan.
Siya nagkanayon nga imbis “go signal” para sa mga sakyanan aduna gyud mga tawo nga mopugos og labang hinungdan nga mohunong ang mga sakyanan hinungdan nga hinay ang dagan sa trapiko.
Una niini ang City of Talisay-Traffic Operation Development Authority (CT-TODA) nipatuman sa istriktong lagda sa trapiko. Kini gumikan kay si Mayor Gerald Anthony “Samsam” Gullas Jr. nagtinguha sa pagpalugak sa dagan sa trapiko sa maong siyudad.
Si Tumulak nagkanayon nga magdepende ang ilang implementasyon sa “no jaywalking” kun ma-amendar na ang ordinansa aron mahatagan og multa ang makalapas aron magmatngon. /GMR (BANAT NEWS)