Mactan-Mandaue Bridge kaduha isirado

CEBU, Philippines – Masinati ang duha ka hugna nga pagsirado sa Sergio Osmeña Bridge o ang Mactan-Mandaue Bridge.

Ang unang hugna masinati sa alas 10 karong Biyernes sa gabii ug ablihan og balik alas 1 sa kaadlawon.

Kini aron pag-andam sa pag-agi sa motorcade sa imahen sa Senyor Santo Niño ug Birhen sa Guadalupe gikan sa National Shrine of Saint Joseph sa Dakbayan sa Manaue nga dad-on sa ngadto sa National Shrine of Virgen dela Regla sa Dakbayan sa Lapu-Lapu.

Matud ni Police Major Zosimo Jabas nga maoy focal police official sa Mandaue City Police Office nga kung hingpit na nga mahidangat sa habig sa Dakbayan sa Lapu-Lapu ang motorcade ablihan na nila ang taytayan.

Alas 5 sa buntag sa Sabado, subling sirad-an ang taytayan apil na ang Marcelo Fernan Bridge diin gidili ang pagtambay sa mga tawo nga motan-aw sa fluvial parade.

Samtang gitinguha sa kapolisan, kaparian sa National Shrine of Saint Joseph ug traffic enforcers sa buhatan sa Traffic Enforcement Agency of Mandaue nga hapsay ug mabulokon ang Traslacion karong Biyernes sa buntag.

Hinoon matud ni Architect Florentino Nimor Jr., hepe sa TEAM, nga samtang paaboton gikan sa Basilica Minore del Sto.Niño ang paghidangat sa imahen sa eskina sa dalan A.S. Fortuna sa Banilad sa Dakbayan sa Sugbo ug Dakbayan sa Mandaue, padayon nga makaagi ang mga sakyanan gu dili nila siradohan ang dalan.

Si Nimor niingon nga alas 8 sa buntag una pa nila isirado ang dalan alang sa pag-agi sa mga sakyanan. Dugang ni Nimor nga kun mahidangat na usab sa eskina sa Highway Seno ang imahen maoy ilang himoon ang pagsirado sa highway ug buksa ang dalan A.S. Fortuna.

Kung ang imahen mahidangat na sa dalan A. del Rosario sa Barangay Guizo moabli na usab ang dalan Highway Seno hangtud maabot na sa simbahan sa Saint Joseph.

Si Monsignor Antonio Medida nga maoy assistant moderator sa National Shrine of Saint Joseph niingon nga human mapahimutang ang duha ka imahen sa sulod sa simbahan sugdan ang arrival mass.

Tugutan ang mga deboto nga makahalok sa imahen hangtud mogikan kini paingon na sa Dakbayan sa Lapu-Lapu.

Si Police Major Jabas niingon nga ang 259 ka polis maoy mobantay sa gawas ug sulod sa simbahan diin higpit nilang idili ang magdala og mga back packs sa ilang pagsulod sa simbahan ug higpit usab nilang gidili ang pagpalupad og drone sa maong lugar ug ilang ipatuman ang no fly drone zone. /GMR (BANAT NEWS)