CEBU, Philippines – Mabulokon ang adlaw kagahapon sa taga Colawin, Lungsod sa Argao human gisaulog ang Founder’s Day ug lakip usab ang blessing and inauguration sa Hilario and Josefa Davide Memorial Library and Museum.
Gipangulohan ni Archbishop Jose Palma ang Eucharistic celebration sulod sa Our Lady of Immaculate Concepcion Parish uban Papal Nuncio, Most Rev. Osbaldo Padilla, ug kaparian sa Archdiocese of Cebu. Ang Santos nga Misa gitambongan nila ni kanhi Chief Justice Hilario Davide Jr. ug mga kabanay niini lakip usab ang mga molupyo sa lugar ug mga tinun-an. Human sa Santos nga Misa gipahigayon ang blessing and inauguration sa Hilario and Josefa Davide Memorial Library and Museum nga gitawag ug Legacy of Love, A God Inspired Vision Realized, A Dream Fulfilled.
Ang blessing ug inauguration sa maong building subay sa ika-115 nga birthday anniversary ni Hilario Davide Sr. o mas gitawag nila og “papa o lolo Undo” sa buhi pa. Ang library usa ka repository sa mga libro nga ilang naangkon sulod sa mga katuigan diin ang una mao ang Holy Bible nga ilang nahuptan niadtong Marso 2, 1929.
Ang maong library ug museum maoy buhing kabilin sa kalampusan sa mga anak nila ni Hilario ug Josefa gumikan sa ilang mga gihimo sa ilang panahon.
Sa dayon sulod sa library ug museum anaa ang hulagway ni Hilario ug Josefa nga makita sa gawas nga bahin niini. /GMR (BANAT NEWS)