Bulkang Taal nibugwak og abo

CEBU, Philippines — Gialerto sa Phivolcs ang mga kalungsoran palibot sa Bulkang Taal nunot sa kalit nga pagbugwak niini og aso 100 ka metros padung sa taas kagahapon sa hapon.

Giisa ang alert level 3 sa Taal Volcano human sa pagbuto niini nga gitawag og phreatic explosion. Ang phreatic explosion mao ang pagbuto mugna sa hinungaw sa tubig nga nibukal tungod sa kainit sa magma, lava o init nga bato.

Ang pagbuto nakuhaan og video sa PhiVolcs pinaagi sa gimuntar nilang camera diha mismo sa baba sa maong bulkan nga gituyo aron pag-monitor niini.

Sa pagsuwat ning balita, padayon pa ang pagbugwak og aso ug abo sa maong bulkan.

Naobserbahan sa Phivolcs nga lima ka mga dapit sa baba sa maong bulkan ang mikusog ang pagbugwak sa hinungaw gikan sa ilawom.

Sukad pa niadtong Marso 28 sa miaging tuig, namatikdan na sa Phivolcs ang kasarangan ngadto sa taas nga seismic activity sa maong bulkan.

“Some of these earthquakes were felt with intensity ranging from Intensity I (Scarcely Perceptible) to Intensity III (Weak Shaking) in the barangays of Calauit, Balete, Sitio Tibag, Pira-Piraso, and Buco, Talisay, Alas-as and Pulangbato, San Nicolas, Batangas. Often, these felt earthquakes are accompanied by rumbling sounds,” matud pa sa gipagawas nga PhiVolcs bulletin kagahapon sa alas 2:30 sa hapon.

Dunay tulo ka mga linog nga natala gikan sa buntag hangtud sa alas 2 sa hapon. Ang Taal Volcano gikonsiderar nga aktibong bulkan ug kataposan kining nibuto niadtong 1977.

Ang tigpamaba sa NDRRMC nga si Mark Timbal mitug-an sa mga tigbalita nga gisugdan na kagahapon sa hapon ang pagawhag pagpabakwit sa mga molupyo sa mga kalungsoran palibot sa maong bulkan sama sa San Nicolas, Balete ug Talisay kagahapon sa hapon.

Gipatuman na sab ang dugay nga giandam nga Taal Volcano contingency plan sa maong probinsya.  Gipasidan-an sab ang publiko nga off-limits ang baba sa maong bulkan.  Ang pinakataas nga alert level sa bulkan mao ang level 6 nga nagpasabot possible ang kinakusgang pagbuto niini. /IBM (BANATNEWS)