CEBU, Philippines — Gipangita karon sa kapolisan sa Police Regional Office 7 ang giilang top 10 hardened drug personalities sa Central Visayas.
Kini subay sa kamanduan sa ulohang buhatan sa Philippine National Police ug sa paghingusog sa kampanya batok sa ilegal nga drugas sa administrasyon ni Presidente Rodrigo Duterte.
Matud ni PRO7 Director, Police Brigadier General Valeriano de Leon, nga bakak ang pamahayag ni Bise Presidente Leni Robredo nga pakyas ang administrasyon ni Duterte sa pagpakiggubat batok sa ilegal nga drugas.
Dugang pa ni de Leon nga aduna silay nahatag nga mga pangalan sa Kampo Crame nga giilang mga big time drug pushers apan wala na namuyo sa Central Visayas tungod sa subsob nila nga kampanya.
Apan iyang giklaro nga magpadayon ang ilang pagpangita kanila bisan pa man nga lisud kining buhaton samtang ang naa pa sa rehiyon maoy target karon sa kapolisan./GMR (BANATNEWS)