Polis sa bohol gi-ambush patay
![Polis sa bohol gi-ambush patay](https://media.philstar.com/photos/2020/01/07/crime_2020-01-07_23-03-20.jpg)
CEBU, Philippines – Gi-ambush patay ang usa ka polis nga gituohang tawo sa nailang druglord nga si Kerwin Espinosa niadtong Lunes sa gabii sa Maribojoc, Probinsiya sa Bohol.
Giila ang biktima nga si Police Corporal Arnel Bayot nga taga Barangag Tinangnan, Tubigon, Bohol ug sakop sa Maribojoc Police Station.
Naangol usab ang iyang asawa nga naa na karon sa usa ka pribadong tambalanan sa Dakbayan sa Tagbilaran.
Kuyog ang magtiayon luwan sa Toyota Corolla padulong unta mopauli sa Lungsod sa Tubigon apan pag-abot sa national highway sa Barangay Guiwanon, Lungsod sa Maribojoc gipaarakan kini sa armalite rifle.
Patay diha-diha si Corporal Bayot tungod sa kadaghang samad sa lawas niini samtang ang asawa nakaangkon lang og samad sa paa ug bukton.
Matud ni Bohol Provincial Police Office Director, Police Colonel Jonathan Cabal, nga ila pang subayon ang motibo sa krimen sanglit niadong 2003 ang iyang amahan nga usa usab ka polis ang gibanhigan patay sab sa Tubigon.
Si Bayot gipaubos sa moral recovery program sa PNP apan matud ni Cabal nga wala pa masayud unsay kaso nga gikalambigitan niini.
Nasayran nga kanhi nadestino sa San Francisco Police Station sa Isla sa Camotes, Probinsiya sa Sugbo si Bayot apan nabalhin kini sa Lalawigan sa Bohol.
Gikan sa kasaligang tinubdan sa Banat News nagkanayon nga nalambigit si Bayot kang Espinosa diin siya matud pa ang mo-escort niini gikan sa Leyte kung mobiyahe paingon sa Sugbo.
Giingong nahimo sab kining body guard sa magsuong Arquillano sa Isla sa Camotes kinsa nadakpan usab sa pagkupot sa dili lisensyadong armas. /GMR (BANAT NEWS)
- Latest