Gun ban ipatuman atol sa Sinulog

CEBU, Philippines – Tinguha sa Cebu City Police Office ang total gun ban atol sa Sinulog Grand Parade sa tibuok Metro Cebu.

Kini maoy gisugyot ni CCPO Director, Police Colonel Engelbert Soriano.

Gibutyag ni Soriano nga bisan pa man ang mga plain clothes personnel walay armas nga dalhon gawas sa mga naka-uniporme.

Nagpadala na siya og suwat sa Philippine National Police Headquarters sa Camp Crame pinaagi ni Police Regional Office 7 Director, Police Brigadier General Valeriano De Leon.

Gawas sa total gun ban idili na usab ang pag-inom sa ilimnong makahubog sulod sa 300-meter radius sa rota sa Sinulog Grand    Parade.

Anaa na karon sa full alert status ang CCPO sukad pa niadtong Lunes human sa formal kick-off sa deployment para sa Sinulog 2020 isip pagpangandam sa pagsugod sa nobenaryo karong Enero 9.

Wala nay police personnel nga mo-leave sa trabaho.

Subay niini andam na usab ang kapolisan sa ipahigayon nga Walk with Jesus sa pormal nga pagbukas sa kapistahan sa Balaang Bata diin kapin 700 ka polis ang ipakatap sa kadalanan ug sa palibot sa Basilica Minore del Santo    Niño.

Aduna usab mga K9 units ang ipakatap sa rota sa prosesyon ang Philippine Drug Enforcement Agency 7 ug PRO-7.

Temporaryo nga hawanan usab ang sidewalk sa mga manindahay aron sa pagseguro sa seguridad sa kapistahan. /GMR (BANAT NEWS)