CEBU, Philippines – Hugot nga bantayan sa Philippine Drug Enforcement Agency nga walay party drugs o bisan unsang klase sa drugas nga makasulod atol sa Sinulog Festival.
Matud ni PDEA-7 Director Wardley Getalla nga nakig-alayon sila karon sa kapolisan ug kagamhanan sa Siyudad sa Sugbo aron pahugtan ang seguridad nga walay mga ilegal nga kalihukan nga mahitabo samtang magpadayon ang mga kalihukan sa Fiesta Senior.
Sumala pa ni Getalla nga ang K9 dogs mohimo og pagsusi sa tanang mga party places aron pagseguro nga walay mga party drugs o bisan unsay klase sa ilegal nga drugas nga makasulod.
Gipahugtan usab nila ang ilang mga intelligence report aron sa pagseguro nga walay mga drug pusher nga makapayuhot sa mga ilegal nga drugas o mga party drugs.
Giawhag usab ni Getalla ang komunidad nga motaho sa buhatan sa PDEA-7 o motawag sa ilang mga hotline numbers 032-255-5260; 09395788775; 09667356585 kung sa higayon aduna silay mabantayan nga nagpayuhot og mga ilegal nga drugas o party drugs sa mga bar o kaha sa ilang mga kasilinganan.
Malaumon si Getalla nga uban sa kapolisan ug lokal nga kagamhanan nga usa ka malinawon ug mabungahon nga kasaulogan sa Fiesta Senior. /GMR (BANAT NEWS)