CEBU, Philippines – Patay ang usa ka drayber sa habal-habal human kini pusila sa wala mailhing kriminal kagahapon sa hapon diha sa Barangay Basak Pardo, Dakbayan sa Sugbo.
Ang biktima giila sa kapolisan nga si Arnold Albano, 34-anyos, taga Sitio Villa Kalubian, Barangay Basak Pardo kinsa nakaangkon og samad pinusilan sa ulo ug dughan niini nga gituohang hinungdan sa iyang kamatayon.
Matud ni Police Staff Sergeant Niccolo Gonzales, imbestigador sa Mambaling Police Station nga sa wala pa mahitabo ang insidente nagpapilit og advisory alang sa mga habal-haval driver ang biktima.
Usa ka wala mailhing lalaki ang kalit lang niduol ug nipusil ngadto sa biktima.
Matud ni Gonzales nga nakig-coordinate sila sa pamilya ug mga kauban nga drayber sa biktima alang sa ilang imbestigasyon.
Nakuha sa kapolisan gikan sa lugar nga nahitaboan ang tulo ka kabhang sa kalibre .45 nga bala. /BDB (BANAT NEWS)