CEBU, Philippines — Walay gihapoy fireworks nga mapaabot ang mga deboto human sa Santos nga Misa sa gabii atol sa bisperas sa kapistahan sa Balaang Bata nga si Senyor Santo Niño diin dungan unta ang pagsayaw sa Sinulog traditional dance.
Kini ang gibutyag sa Rector sa Basilica Minore del Sto. Niño nga si Fr. Pacifico Nahora Jr, OSA, nga nahinabi sa mga tigbalita.
Matud pa ni Nahora nga ang budget karong tuiga nga igasto nila alang sa fireworks ila kining gamiton sa pagtabang sa mga nabiktima sa bagyong Ursula sa Isla sa Kintarkan, sakop sa Lungsod sa Santa Fe.
Ang Kintarkan usa sa mission station sa Augustinian hinungdan nga usa kini sa ilang tutukan karon nga tabangan ilabi na daghan ang nahimong biktima sa maong bagyo.
Gitug-an ni Nahora nga pipila ka tuig na nga wala na silay fireworks tungod kay ilang itabang sa mas labing nanginahanglan ang budget para unta sa pabuto.
Ang dili pagpahigayon og fireworks makatabang usab kini sa kalikupan kay wala may aso tungod sa pabuto. GMR (BANATNEWS)