CEBU, Philippines — Zero casualty sa paboto ug walay indiscriminate firing maoy marching order ni Mayor Edgardo Labella ngadto sa bag-ong officer-in-charge sa Cebu City Police Office, Police Col. Engelbert Soriano, atol sa ilang tigum kagahapon sa buntag uban ang mga station commanders.
Matud ni Labella nga kung mahimo walay makalas sa paboto o kaha sa pagpaboto sa mga polis gamit ang ilang mga armas atol sa pagsugat sa Bag-ong Tuig karong tungang gabii.
Dugang pa sa mayor nga kinahanglan taktakon gyud sa ilang serbisyo ang mga polis nga masakpang magpaboto gamit ang ilang mga armas.
Sumala pa ni Labella nga angayan sab nga dili mohunong ug molugak ang kapolisan sa ilang kampanya batok sa ilegal nga drugas.
Si Soriano sa iyang bahin nitug-an nga mao sab kini ang iyang tinguha sanglit mao sab kini ang iyang programa ug maoy warning niya ngadto sa mga polis nga malambigit sa firecracker-related incident ug indiscriminate firing nga aduna gyuy atubangon nga mga tulubagon.
Gipahimangnoan ni Soriano ang kapolisan nga dili mag-inom panahon sa pagsugat sa Bag-ong Tuig ug seguruhon gyud ang ilang mga trabaho ug dili usab magtulog-tulog.
Si Cebu City Vice Mayor Michael Rama sa iyang bahin nipahinumdum sa publiko nga magpabiling mabinantayon alang sa pagsugat sa Bag-ong Tuig.
“New year has to be welcomed with a sense of optimism,” sigun ni Rama.
Giawhag sab niya ang publiko nga hugot nga mag-ampo aron ipalayo ang Sugbo ilabi na ang Siyudad sa Sugbo sa mga kalamidad ug peligro.
Alang kang Rama espesyal ang 2020 tungod kay dinhi ipahigayon ang pagpangandam alang sa ika-500 ka tuig sa Kristiyanismo nga iselebrar tuig 2021.
Samtang walay laing panghinaut si Talisay City Mayor Gerald Anthony “Samsam” Gullas Jr. nga sugaton ang Bag-ong Tuig nga malinawon ug luwas.
Ang mayor nisuporta sa gihimo sa kapolisan sa siyudad sa pagpahinumdum sa katawhan nga likayan ang paggamit og paboto aron malikay sa disgrasya.
Samtang gipahimangnoan sab ang mga tawo nga adunay armas nga likayan ang pagpaboto aron malikay sa peligro ang ubang tawo.
Inay paboto ang gamiton sa pagsaba-saba nirekomendar sab ang mayor nga torotot o bisan unsa nga gamit alang sa pagsaba-saba ang gamiton sa pagsugat sa Bag-ong Tuig. GMR (BANATNEWS)