Balay nga dunay mga pabuto nasunog

CEBU, Philippines — Balay nga adunay bodega sa pabuto naugdaw human niulbo  ang mga pabuto ug nakaingon sa dakong sunog kagahapon diha sa Purok Kapayas, Barangay Canjulao, Dakbayan sa Lapu-Lapu.

Nadawat sa kabomberohan ang alarma sa maong sunog alas 2:24 sa hapon ug giisa  dayon ngadto sa third alarm tungod sa mga kasikbit nga mga balay. Hinuon nakontrolar kini pagka alas 4:30 sa hapon.

Ang sunog gituohan nagsugod sa ikaduhang andana sa panimalay ni James Berdin. Sa ubos nga bahin sa balay adunay kwarto nga nagsilbing bodega sa mga pabuto, wala hinuon matino pa sa kabomberohan kun ang mga pabuto ba maoy miulbo ug nakaingon sa sunog.

Matud pa ni Fire Officer 1 Mildred Villaban, Desk Operator, padayon pa nga nikuha sa kinatibuk-an nga detalye ang fire investigator nga si Fire Officer 3 Oiretuele Baguio, lakip usab sa hinungdan sa maong sunog.

Gibanabana nga moabot ngadto sa P160 mil ang danyos sa maong sunog. Maayo nalang hinuon nga walay gikatahong nakalas o naangol sa maong pag-ulbo sa sunog.

Sa pikas bahin, gipanghingusgan sa Cebu City Police Office (CCPO) ang pagsakmit sa mga pabuto nga illegal nga gipamaligya sa mga tindahan diha sa Brgy. Ermita sa Dakbayan sa Sugbo.

Matud ni CCPO Deputy City Director for Operation Police Lieutenant Colonel Randy Korret nga nakadawat sila og impormasyon kalabot nga adunay mga pabuto nga gipamaligya sa mga tindahan.  Nagpahigayon sila og pakisusi sa mga tindahan nga giingong namaligya og mga pabuto hinungdan sa pagkasakmit sa mga sakop sa Carbon Police Station sa nagkalain-laing pabuto sama sa Fountain, Flash Thunder, Baby Rocket, Roman candles, Steel Beauty, Rotating fireworks, ug uban pa.

Ang dakbayan nagdili sa pagpamaligya og pabuto bisan asang dapita tungod kaya ang firecracker zone didto lang gyud sa South Road Properties ug ang mga naninda didto nagkuha gyud og business permit, fire safety permits ug uban pang rekisitos.

Padayon ang panawagan sa kapolisan sa publiko nga dili mopalit og pabuto sa mga namaligya gawas sa SRP. Gipasalig usab sa kapolisan nga magpadayon gihapon ang ilang pag pakumpiskar sa mga pabuto nga ibaligya sa mga tindahan. /IBM (BANATNEWS)