CEBU, Philippines — Gipaubos sa red alert ang Provincial Disaster Risk Reduction and Management Office (PDRRMO) tungod sa bagyo human sa panagtigom sa PDRRM Council kagahapon gipangulohan ni Gobernador Gwendolyn Garcia.
Ang PDRRMO niabiso ngadto sa mga local disaster offices sa mga lungsod nga mopahigayon og pre-emptive evacuation sa mga “high risk” areas o mga lugar nga prone sa pagbaha ug pagdahili sa yuta lakip na sa mga lugar maapektohan kun adunay storm surge.
Matud ni Rhee Telen Jr. sa PDRRMO nga naka prepositioned na ang mga heavy equipment pag-andam sa deployment kon kinahanglan. Bisan ang Social Welfare Office sa Kapitolyo, nag andam na usab sa mga relief goods nga ihatod alang sa mga bakwit.
Ang Provincial Health Office lakip na ang 16 ka provincial ug district hospitals anaa na usab karon sa “Code White” status tungod sa bagyo.
Si Neil Sanchez ang hepe sa PDRRMO nagkanayon nga usa sa ilang gitutukan ang mga lugar duol sa baybayon.
Samtang mipatawag sab si Cebu City Mayor Edgardo Labella og tigom kagahapon aron pangandaman ang bagyo. Gibutyag ni City Administrator Floro Casas Jr. nga 24-oras nilang bantayan ang bagyo gikan sa giestablisar nga command center sa buhatan sa mayor.
Giawhag sab ang publiko nga mamundo daan og tubig, pagkaon, flashlights ug uban pa.
Sugod kagahapon sa alas 12 sa udto gitugotan na sa truck ban ang mga delivery trucks nga nagkarga og pagkaon, tubig, oil tankers hangtud makagawas ang bagyo aron pagsigurong dunay paigong supply ang dakbayan.
Ang pangulo sa CDRRMC nga si Atty. Gerry Carillo miingon nga posibleng dunay preemptive evacuation nga himuon kun ang PAGASA modeklarar sa mga lugar nga peligro.
Sa pikas bahin, si PRO7 Deputy Regional Director for Operation Police Colonel Geovanie Maines mimando sa mga police stations monitoron ang mga lugar nga peligro sa pagdahili sa yuta, baha ug dagkong bawod ug tabangan ang mga LGUs.
Naka-estambay karon ang mga sakop sa Provincial ug City Mobile Forces Company aron makaresponde kun gikinahanglan.
Samtang gipahugtan sab ang seguridad sa mga pantalan nunot sa pagkatanggong sa daghang pasahero. IBM (BANATNEWS)