100 ka parisan makabenepisyo sa mass wedding matag tuig

CEBU, Philippines — Giaprobahan sa konseho sa Dakbayan sa Sugbo ang ordinansa nga gipanginahanan ni Konsehal Lea Japson alang sa pagpahigayon sa kagamhanan sa siyudad og mass wedding matag tuig.

Ubos sa maong ordinansa ang siyudad mogahin kini og tukmang pundo alang sa maong proyekto.

Tumong ni Japson nga ang mga nagpuyopuyo nga mga residente sa siyudad makasal kini aron makadawat sila og bendisyon gikan sa simbahan.

Sulod sa 12 ka tuig ang kagamhanan sa Dakbayan sa Sugbo pinaagi sa Cebu City Women and Family Affairs Commission (CCWFAC) ubos sa koordinasyon sa Department of Social Welfare Services nagpahigayon kini og tinuig nga mass wedding alang sa mga kabus ug walay ikagasto sa pagpakasal ug walay ikaabot og bayad sa mga rekisitos sama sa pagpaubos sa marriage seminar, marriage application, pre-marriage application fee, pagkuha og Certificate og No-Marriage (CENOMAR) ug uban pa.

Ang mga kwalipikado nga beneficiaries sa mass wedding kadtong mga residente ug rehistradong botante sa Dakbayan sa Sugbo.

Ubos usab sa maong ordinansa nga ang CCWFAC maoy mopili og 100 ka parisan matag tuig nga makabenipisyo sa mass wedding. /BDB (BANATNEWS)