LGUs kinahanglang dunay firecracker zones

CEBU, Philippines — Magsugod na ang Bureau of Fire Protection 7 pagsusi sa mga lugar nga gipili sa mga local government units isip firecracker zone ug display area mga baligyang mga paboto dinhi sa Central Visayas aron pagsigurong luwas ang publiko gikan sa mga aksidente.

Gibutyag ni BFP-7 Regional Director Senior Supt. Gilbert Dolot sa Banat News nga ang mga LGUs maoy mopili sa firecracker zone ug kadtong wala pay nakita ilaha kining giawhag nga sa mga lugar gyud nga layo sa mga establisemento ug kabalayan ang haom nga butangan niini.

Kung makita nila nga dili kini luwas morekomendar sila sa mga angayan nga pagabuhaton apan matud niya mas maayong sa pagpili palang sa lugar kadto gyung layo sa peligro ang mga tawo.

Ang Cebu City nipili sa South Road Properties nga maoy baligyaanan sa mga pabuto, layo kini sa kabalayan ug sa mga tawo.

Sa Dakbayan  sa Lapu-Lapu diin dunay industriya sa pabuto sa Barangay Babag, Canjulao ug Kalawisan.

Apan base sa nagkuha og business permits paghimo og pabuto nikubos kini sumala pa sa BFP. Gikan sa kapin 100 sa miaging tuig karon 89 nalang.  Ang pabuto higpit ng gidili dinhi sa nasud nunot sa mga natalang aksidente ug usa kini sa gitumbok nga hinungdan nganong nihinay ang negosyong sama niini.

Si Police  Colonel  Clarito Baja miingon nga higpit nilang ipatuman ang Republic Act 7183  nga nag-regulate sa pagbaligya, pagpamuhat ug pagamit og pabuto.

Sa nakalabay nga lima ka tuig, ang buhatan sa  PNP Firearms and Explosives Office nakatala og pagkunhod sa gidaghanon  sa mga fireworks related injuries nga miabot og 66.95% .

Si Officer-in-Charge, PNP, Police Lieutenant General Archie Francisco Gamboa miingon nga ang kampanya kontra pabuto magmalampuson pinaagi sa media ug pagedukar sa katawhan bahin niini ilabi na nga mipagawas og kamandoan si Presidente Rodrigo Roa Duterte nga Executive Order 28 nga nag-regulate sa paggamit sa pabuto. /IBM (BANATNEWS)