CEBU, Philippines — Ang Rise UP Cebu nagpahigayon og kalihukan diin tumong niini ang pagtabang sa pamilya sa giingong mga nabiktima sa extra judicial killings (EJK).
Si Padre Jonash Joyohoy sa Iglesia Filipina Independiente nagkanayon nga ang ilang kalihukan usa ka public gathering ug Christmas fellowship sa Rise Up Cebu diin naningkamot sila nga matapok ang mga biktima sa “Tokhang” o drug related killings sa Sugbo kini aron makatabang sila nga maundang ang maong klase sa pangabuso.
Ug tungod kay duol na ang pasko ug karong adlawa Human Rights Day hinungdan nga gitapok nila ang mga ni-respond nga mga pamilya sa Metro Cebu.
Matud ni Joyohoy nga motabang usab sila aron makab-ot ang hustisya sa mga pamilya nga nabiktima sa Tokhang.
“Nag-gather ta og data, nisulay ta og adto sa mga police offices sa tulo ka main urban centers Talisay, Cebu City ug Mandaue naay mga mga success stories naa puy mga nabalibaran ug wala matagai pero ang mga pamilya nga apektado gusto man gyud nila mapasaka sa korte ang kaso aron naay hustisya ang ilahang mga mahal sa kinabuhi ba”, padayag ni Joyohoy.
Pipila sa mga pamilya nga nisanong sa imbetasyon sa Rise Up Cebu mao ang managsilingan sa Barangay Ermita, siyudad sa Sugbo nga sila si Elizabeth Ordonia ug Raquel Lopez.
Ang pag-umangkon ni Ordonia nga si Romy Ramas napatay sulod sa prisohan niadtong buwan sa Hulyo niining tuiga samtang ang anak ni Lopez nga si Rabby giingong napatay atol sa “One Time Big Time” nga nahitabo niadtong buwan sa Oktubre sa niaging tuig. BDB (BANATNEWS)