CEBU, Philippines — Nagtingkagol sa prisohan ang us aka 33- anyos nga babaye human siya gidakop sa mga sakop sa Mabolo Police Station tungod sa paglabay niini og humidifier ngadto sa nawong sa usa ka promodiser sa sud sa usa ka dakong mall sa uptown area sa Dakbayan sa Sugbo.
Ang maong babaye nakuhaan og video sa usa sa mga tawo didto samtang iyahang gikasab-an ang promodiser ug sa pagkataudtaod gilabay niya kini og butang nga usa diay ka humidifier hinungdan sa pagkasamad sa nawong sa biktima. Ang video dali nga nag-viral ug nakaabot dayon og us aka milyon ang nakakita, 33 mil ang nag share ug dul-an 19 mil ang nikomento. Ang maong video tulo lang ka minutos ang gitas-on.
Ang maong babaye makita sa video nga nagkugos kini sa iyang anak samtang nagsige og lalis sa promodiser. Taud-taod midako ang tingog sa maong babaye samtang kini gialam-alaman sa kaubang lalaki. Dangtan paglabay sa pipila ka segundos kalit nga gipunit sa babaye ang usa ka baligya nga humidifier ug gilabay kini sa nawong sa promodiser ug naigo ang wala niini nga mata.
Ang maong promodiser giila nga si Jennifer Fabillar,33, residente sa Barangay Mabolo kinsa mipasala og reklamo diha sa Mabolo Police Station kagahapon.
Ang suspek giila sa kapolisan nga si Medelina Berja Yamazaki gidakop sa kapolisan sayo sa kaadlawon sud sa iyang gipuy-ang condominium diha sa Solinia Tower Ayala Business Park. Wala hinuon kini nagmagahi pagsikop kaniya.
Matud ni Police Major Dindo Juanito Alaras, hepe sa Mabolo Police Station ilaha pang giimbestigar kun unsay sinugdanan sa panaglalis sa duha.
Apan base sa inisyal nilang impormasyon, giingong naglalis ang duha tungod kay wala sila magkasinabot kun unsaon paggamit ang humidifier.
Matud ni Alaras nagdugo ang mata ni Fabillar tungod sa pagkaigo sa maong humidifier. Karong adlawa ipasaka ang kasong Physical Injury.
Gisuwayan unta sa Banat News pagkuha sa iyang habig si Yamazaki apan wala kini mohatag og pamahayag. /IBM (BANATNEWS)